Mga PSK sa Arkidyosis sa Dabaw nagtapok

Isip pagsaulog sa pagka-gasa sa mga layko dinhi sa Archdiocese of Davao, gihimo ang panagtapok sa mga Pangulo sa Katilingban (PSK) sa mga nagkalain-laing Gagmay’ng Kristohanong Katilingban (GKK) nga sakop sa mga parokya sa arkidyosis.

Kauban si Archbishop Romulo G. Valles, ang panagtapok gihimo sa St. Francis Xavier Regional Major Seminary, Oktubre 25.

Si Archbishop Valles naghatag usab og pagpaambit sa mga layko mahitungod sa CBCP Pastoral Letter on Mercy and Compassion, isip pagpangandam sa pag-abot ni Pope Francis karong Enero 2015.

Giingon ni Archbishop Valles nga angay puy-an sa mga PSK ang kaluoy ug puangod diha sa ilang pagpangalagad sa mga miyembro sa ilang tagsa-tagsa ka katilingban.

Gihatag ni Abp. Valles nga ehemplo ang pag-issue og Information Data Sheet (IDS) ngadto sa mga miyembro nga nanginahanglan niini panahon sa pagpabunyag sa ilang mga anak ug pagpakasal, ug uban pa.

Giingon ni Abp. Valles nga dili angay palisud-lisuron ang mga miyembro nga dili aktibo sa GKK aron lamang ipakita ang gahum sa PSK.

Dugang pa niya nga ang mga PSK ang representante sa Simbahan ilabi na ngadto sa mga lugar nga suok ug layo.

Human sa pagpa-ambit ni Abp. Valles, gihimo ang ceremonial giving of ID diin gitaud ni Abp. Valles ang mga ID sa mga GKK Coordinator isip simbolo sa pag-ila kanila nga mga pangulo sa katilingban.

Ang mga PSK nagtaud usab sa mga ID ngadto sa ilang mga miyembro ug naghimo usab sila sa ilang sharing mahitungod sa gipaambit ni Abp. Valles isip pagpalugdang niini diha sa small group sharing.

Si Mayla Rocaberte, GKK Coordinator sa Holy Family Parish sa Baliok mipadayag sa iyang kalipay sa pagpaminaw sa pagpa-ambit sa Arsobispo.

Sa pakighinabi sa DCHerald, giingon niya nga nadawat niya ang gasa sa pagpangalagad ug na-dasig siya nga padayon nga mangalagad sa iyang isig katawo diha sa pagka-katekista ug GKK Coordinator.

Si Maritess Novo, PSK sukad niadtong 1998 sa San Pedro Cathedral nag-ingon nga ang mga PSK dili diay patas-anay sa estado sa pagtoo ug ang tanan pantay lang isip mga binunyagan.

“Bisan pa sa kabug-aton sa akong buluhaton, nasayran nako nga gitawag gyud diay ko. Dako ang akong katungdanan apan himoon nako kini sa yano nga paagi,” sumala niya.

Human sa mga pagpaambit ang mga PSK nagpakita sa ilang mga talento matag vicariate.

Gitapos ang maong panagtapok pinaagi sa pagsaulog sa Santos nga Misa. (@johnfrancesf)