Bunga sa Tuig sa mga Layko

Sumala sa “CBCP Pastoral Exhortation on the Era of New Evangelization” ( July 2013) dunay upat ka tinguhaon niining tuig sa mga Layko. Kini maoy mahimo natong sukdanan sa pagsusi kon asa na kita kutob sa pagkab-ot niining mga mahinungdanong butang ug unsa pay kinahanglang buhaton.
1. Ang Sakramento sa Bunyag ug Sakramento sa Kompirma. Saulogon ang sakramento sa Bunyag ug Kompirma. Pinaagi sa grasya sa kamatayon ug pagkabanhaw ni Hesukristo, ang mga layko gigasahan ug nakabaton sa dakong gasa sa pagkasinagop nga mga anak sa Dios (Bunyag) ug gigamhan sa Spirito Santo aron mahimong mga misyonerong sumuunod ni Kristo (Kompirma). Tungod niini nakabaton ang tanang mga layko sa talagsaong Diosnong dignidad ug kahalangdon. Pagkabulahan gayud ang mga Layko.
Dako kaayo kini nga mga gasa nga madawat sa kasaulogan sa Bunyag ug Kompirma. Angayan lamang nga saulogon sa Simbahan (parokya ug GKK, sa pamilya) sa paagi diin masinati gayud ang kabililhon niining mga sakramento. Nalantawan unta pagusab ang paagi sa pamilya, sa Gkk ug sa Parokya, ang ilang mga paagi sa pagpangandam, paghatag sa Katekesis, pagsaulog sa sakramento, ug ang pagpuyo sa kahulugan sa sakamento.

2. Pagpukaw sa mga spiritohanong gasa sa mga Layko. Bisan tuod nadawat na sa mga gibunyagan ug gikompirmahan ang mga balaan ug gamhanang mga spiritohanong gasa sa sakramento, daghang mga layko nato sa Simbahan nga mabugnawon, maluyahon, panagsa ra, o wala na gayud nagbansay sa kinabuhing Kristohanon uban sa Simbahan. Kulang ang mga nangalagad nga layko sa Simbahan. Kulang kaayo sa bokasyon sa pagkapari ug pagkarelihiyoso. Nagkadaiya ang hinungdan niining kahimtang.
Ang mga spiritohanong gasa nga nadawat pinaagi sa mga sakramento gikinahangalan mahibaloan ug masinati sa tanan nga dili kini alang lamang sa kaugalingong kabulahanan o kaluwasan, kon dili aron mapaambit kini. Sa ingon, maamguhan sa uban nga sila usab gidapit sa Dios nga moambit niining panaglambigitay sa kamatuoran, hustisya, gugma ug kagawasan, uban sa Dios ug sa isigkatawo.
Giunsa nato pagpukaw ang mga gasa sa mga Layko niining tuiga? Nagpahigayon kita og mga seminar, mga congress, mga conference, mga convention alang sa mga layko nga nangapil na daan sa kalihokan sa Simbahan. Apan sila nga layo sa Simbahan o namiya na? Sila nga ana sa lainlaing sektor sa sosyedad? Unsang outreach ang napahitabo nato.

3. Ang tanang mga Layko mahimong responsableng magsasangyaw. Ang mga layko lamang ang makaabot niadtong mga tawo, mga dapit, ug mga kahimtang sa kadaghanan nga dili maabot sa taga Simbahan. Ang mga laykong misyonerong sumusunod ni Kristo lamang ang makahimo niini. Kinahanglan maamguhan ug matuman sa mga layko kining dako nilang tahas.
Mao kini ang hinungdan nga kinahanglan nato ang Bag-ong Pagsangyaw sa Ebanghelyo. Kinahanglan nga manlimbasog kita pagusab sa pagsangayaw kang Kristo una sa tanan, aron Siya maila, mahalon, ug sundon. (kerigma). Kini ang magtultol sa tawo sa pagbag-o sa kinabuhi diha kang Kristo ug uban kang Kristo. Kinahanglan ang mapadayonong pagmatuto sa pagtoo diha sa pamilya. Kinahanglan ang pagpahamtong sa pagtoo pinaagi sa mapadayonong katekesis ngadto sa mga bata, batan-on ug mga hamtong.
Diha lamang sa pagkab-ot sa pagbag-o sa kinabuhi tungod sa pakigtagbo kang Kristo, nga ang mga Layko mamahimong responsable usab nga mosangyaw sa Ebanghelyo sa tanang dapit ug kahimtang diin siya nahimutang.

4. Manguna ug mangulo ang mga Layko sa pagbag-o sa sosyedad. Ang mga layko maoy anaa sa sosyedad – sa pamilya, sa kultura, sa arte, sa negosyo, sa politika, sa edukasyon ubp. Maoy hinungdan nga sila ang angayan manguna ug mangulo sa pagbag-o sa sosyeded pinasikad sa Ebanghelyo. Ang mga layko lamang ang anaa sa mga dapit ug kahimtang sa tawo nga gawas ug layo sa Simbahan. Pinaagi sa mga layko ang Simbahan maanaa sa maong mga dapit ug kahimtang.
Sa pagkab-ot niini, kinahanglan ang mga hamtong nga magtotoo ni Kristo. Ang mga laykong sumusunod ni Kristo maoy mahimong mga misyonero niining mga kahimtanga. Ang maong mga layko lamang ang andam nga magmadawaton, matinumanon ug masaksihon sa “Social Teachings” sa Simbahan. Sila ang magadala sa kahayag sa maong mga pagtulun-an aron mapatigayon ug molambo ang sosyedad sumala sa Ebanghelyo.
Sa laktod nga pagkasulti, ang tumong nato uban sa mga layko dili lamang nga madawat nila ang mga sakramento (sacramentalization), kon dili, ang pagumol ug pagmatuto sa mga layko kinahanglang malangkubon aron mahimo silang “misyonerong mga sumusunod ni Kristo” ( EG 120) nahilambigit sa katilingban sa mga sumusunod ni Kristo.