Ang Simbahan sa mga Kabus

Niadto pang tuig 1991, sa ika-2 Konsilyo Plenaryo sa Pilipinas (PCP II) , gipadayag sa Simbahan sa Pilipinas, nga ang ika-3 nga gitinguhang nabag-ong Simbahan diri sa Pilipinas mao ang “Simbahan sa mga Kabus.” Sumpay ug dugtong kini sa una, nabag-ong malukpanong pagsangyaw sa Ebanghelyo, ug ika-2, sa pagtukod sa mga katilingban sa mga sumusunod ni Kristo.

Ang ika-3 ka tuig sa atong novena sa atong Panahon sa Bag-ong Pagsangyaw sa Ebanghelyo, mao ang Tuig sa mga Kabus. Lain na usab nga higayon nga tagaan ug pansin kining atong gilantaw nga pagpakita sa tinuod nga kinaiya ug kasamahan sa Simbahan pinasikad sa panig-ingnan mismo ni Kristo sa iyang kinabuhi ug ministriya. Gitinguha karon sa Simbahan nga madungagan pa ang atong kusog ug kalig-on sa paghatag ug katumanan niining laraw uban sa Diosnong grasya. Nagapadayon kini nga higayon ug hagit ngadto sa tanan.

Si Kristo ang hinungdan sa Simbahan sa mga Kabus

Gidihugan si Jesus sa Spirito Santo ug gipadala aron pagsangayaw sa Maayong Balita ngadto sa mga kabus (Lk.4:18-19). Bisan asa siya miadto, kanunay ang iyang pagpakabana sa kahimtang sa mga kabus ug nagtagad kanila.

Gitudlo ni Jesus nga, “bulahan kamong mga kabus,kay maghari ang Dios kaninyo (Lk:6:20).

Bisan tuod siya Dios, iyang gitalikdan kini, nagpaubos siya aron mahimong tawo, mahimong ulipon, ug gitugyan ang kaugalingon, nagmasinugtanon hangtod sa kamatayon sa krus (Fil. 2:6-8 ). Nagpakasama siya sa mga kabus.

Matod pa niya, mianhi siya sa kalibutan dili aron alagaran, apan aron moalagad ug mahimong sumbanan sa iyang mga sumusunod (Lk. 22:24-27).

Gipalabi niya ang mga kabus nga naalaot tungod sa kawad-on, kagutom, kauhaw, sa sa pagkasinalikway, sa pagkahisalaag sa sala ug dautan, sa pagkabuhong sa kalibutanong butang, sa pagsalikway sa Dios, ug naalaot sa tanang matang sa sakit sa lawas ug kalag. Sila kasagaran ang giatiman, gitagad ug giayo ni Jesus. Matud pa niya, ang mga masakiton ang nanginahanglan sa doctor, dili ang mga walay sakit (Lk. 6:31).
Sila ang giila niyang labing ubos niyang mga igsoon. Ug sa katapusan, ang pagtagad sa mga kabus maoy iyang gihimong sukdanan sa paghukom kon kinsa ang makasulod sa gingharian sa Dios. Sa pagtagad sa mga gigutom, sa giuhaw, sa dumuduong, sa hubo, sa masakiton ug sa piniriso nga iyang mga labing ubos nga igsoon, Siya – si Jesus, ang gitagad ( Mt. 25:31-40)
Mabination ug Malooy-on ngadto sa nga kabus

Kung mao kini si Kristo, nan, wala kitay laing himoon kon dili ang pagkinabuhi sama kaniya isip Iyang mga tinun-an ug mga susmusunod. Ug sa kahimtang sa Pilipinas ug sa tibuok kalibutan, diin daghan kaayo ang gisalikway ug nagantus sa kaalaot sa tanang matang sa kakabus, tataw kaayo ang atong misyon – palabihon pa gayud ang magmabination ug maloloy-on sa mga kabus.

Niining tuig, lantawon pagusab nato ang lainlain natong paagi aron sa pagumol sa atong mga kaubanan nga makabaton sa maayo ug malumo nga kasingkasing, diha sa pamilya, diha sa sa tulunghaan, ug sa katilingban. Pahingusgan pa gayud nato ang pagtukod og Simbahan isip maguumol sa pag-ampo ug sa inigsoong panaglambigitay aron mahimong katilingban sa mga kabus ug mabination ug maalagaron sa mga kabus. Sa ingon niini mahimo kitang Simbahan nga naglarawan sa Diosnong gugma ug kalooy.

Sa ingon lamang niining pagumol og mga mabination ug maloloy-ong sumusunod ni Kristo matagaan og katumanan ang mapadayonon ug mabungahong ministriya sa gugma sa Simbahan. Sa maong paagi, dili lamang sa panahon sa katalagman, mapadayag sa Simbahan ang iyang pagmaloyloy-on kon dili a tanang panahon ug kahimtang.

Gihimo na ni Papa Benedikto kaniadto ang lagda Lng sa tibuok Simbahan nga tukuron ug organisahon sa matag diyosesis, parokya ug laing institusyon sa Simbahan ang ministriya sa gugma ug kalooy. Salamat kaayo kay naa pay daghang mga kasinatian ug panig-ingnan bahin niini. Kinahanglan na lang ang dugang pang panaglambigitay ug pagtinabangay dili lamang tali sa mga grupo sa Simbahan, kon dili ngadto ug uban usab sa laing institusyon gawas sa ato.

Ang pagbisita sa atong Santo Papa Francisco, kinsa naninguha pag-ayo sa pagpadayag sa importansya sa pagatagad sa mga kabus ug sa kabuhatan, siguradong magadasig ug magapaisog kanato nga mangahas nga atubangon ang mga hagit, ug daogon ang kahadlok ug manlimbasog nga mahimong mga mabination ug maloloy-ong misyonerong sumusunod ni Kristo.