Ang Sakramento sa Eyukaristiya

P: Unsa man ang Eyukaristiya?

T: Ang Eyukaristiya mao gayod ang mismo nga sakripisyo sa Lawas ug Dugo sa Ginoong Jesus nga iyang gitukod aron pagpatunhay sa sakripisyo sa krus latas sa katuigan hangtod sa iyang pagbalik diha sa himaya. Mao nga gitugyan niya sa iyang Simbahan kining handomanan sa iyang kamatayon ug Pagkabanhaw. Kini usa ka timaan sa panaghiusa, usa ka bugkos sa gugma, usa ka bangkete paskuwal, diin si Cristo ang gipanag-ambitan, ang salabotan gipuno sa grasya ug ang usa ka pasalig sa umaabot nga himaya gihatag kanato.

P: Kanus-a man gitukod ni Jesucristo ang Eyukaristiya?

T: Gitukod ni Jesus ang Eyukaristiya sa Huwebes Santo “sa gabii nga siya gibudhian” (1 Corinto 11:23), samtang nagsaulog siya sa Kataposang panihapon uban sa iyang mga apostoles.

P: Giunsa man niya pagtukod ang Eyukaristiya?

T: Human siya nakigtigom sa iyang mga apostoles didto sa Senakulo, si Jesus mikuha og pan sa iyang mga kamot. Siya mipikas ug mihatag niini ngadto kanila sa pag-ingon, “Dawata kini ninyo ngatanan ug kan-a kay kini mao ang Lawas nga itugyan alang kaninyo”. Dayon mikuha siya ug kupa sa bino sa iyang mga kamot ug miingon, “Dawata kini ug panginom kamo nga tanan gikan niini kay kini mao ang kalis sa akong Dugo, ang Dugo nga giula alang kaninyo ug alang sa tanang mga tawo aron ang mga sala mapasaylo. Buhata kini sa akong handomanan.” (Kompendiyo sa Katesismo sa Simbahang Katoliko, 271-273)