Ang Pagka-hari ni Ginoong Jesukristo

Ang Simbahang Katoliko sa tibuok Kalibutan nagasaulog karon sa paghandom, pahinungod saPAGKA-HARI ni GINOONG JESUKRISTO.

Isip Kristiyanos atong gipasidunggan ang atong Ginoong Hesus isip atong hari ug Dios nga maoy miluwas kanato.

Kini nga pasidungog ug titulo sa kasaulogan sa paghandom sa pagka-hari ni Kristo makita diha sa mga nagkalain-laing mga sinulat diha sa Balaang Kasulatan. Hari nga walay katapusan (1 Tim. 1:17), Hari sa Israel (Juan 1:49),Hari sa mga Hudiyo (Mateo 27:11), Hari sa mga hari (1 Tim. 6:15, Pinadayag 19:16), Hari sa tanang kapanahonan (Pinadayag 15:3), Magboboot sa tanang mga hari sa kalibutan (Pinadayag 1:5). Sa kahayag diha sa atong pagtoo ang kinabuhi ni Ginoong Jesukristo mao ang walay pagka-bugto nga serye sa buhat sa gugma niya ngadto sa tawo. Ug tungod sa maong gugma sa Dios kanato na-aghat ang Anak sa Dios nga mahimong tawo o mokuha ug tawhanong kinaiya aron sa pagluwas kanato gikan sa kaulipnan sala, ug kini iyang gibuhat nga aduna gayoy kalabotan ug sugo sa iyang Amahan: “Kay gihigugma pag-ayo sa Dios ang kalibutan , busa iyang gipadala ang iyang bugtong Anak, aron ang tanan nga motuo kaniya maluwas” (Juan 3:16).

Sulod sa 30 katuig, si Jesukristo mipakita sa iyang gugma pinaagi sa simple ug yano nga pagpuyo lamang (life of poverty).

Sa iyang pagsugod sa pagsangyaw, siya nagsugod sa simple ug kaayo nga pagpangalagad lamang nganha sa iyang isigkatawo “nagbuhat sa maayo, ug naga-ayo niadtong mga nayawaan” (Buhat 10:38). Siya usab nagapakita ug walay sukod nga mga kaayo sa tanan, nagbuhat sa iyang milagrosong gahum sa pagpangayo sa mga masakiton, pagtudlo sa kamatuoran, pagsaksi ngadto sa Amahan, pagtawag sa mga nagkalayo,ug nagkabudlay aron paghatag ug kapahulayan, pagtudlo sa mga wala masayod , pagtudlo sa paghigugma sa uban ug sa kaaway, pagwali sa Gingharian sa Dios ug ang labaw sa tanan ang paghatag sa iyang kaugalingon isip bugti o bayad alang sa atong kaluwasan (Mateo 11:28, Juan 15:13, Mateo 26:28 ug Mateo 6:33).

Ug diha usab sa pagka-balaan ni Ginoong Jesukristo siya wala gayoy lama sa pagka-dautan (1 Pedro 2:22), luyo sa mga negatibong nagapasipala nganha kaniya (Juan 8:46), bisan pa ang mga dautang espiritu naga-ila kaniya nga labing Balaan ug iya sa Dios (Marcos 1:24, Lucas 4:34).

Busa ang atong Ginoong Jesukristo sa pag-anhi niya sa kalibutan bisan ug ginapasanginlan siya nga tigpasipala sa balaod sa hudiyo apan nagapabilin siya nga balaan sa kanunay ug mas labaw pa nga naila sa pagtudlo niya sa Gingharian sa Dios nga lugar sa pagka-balaan, (Juan 19:16, Mateo 26:65).

Ang Pagka-Hari ni Jesukristo labaw sa tanan, ang iyang pagka-Hari mao ang birtud sa iyang buhat sa pagpangluwas nga iyang nabuhat dinhi kanato, aron nga madaug o mailog ang iyang gingharian ug madepensahan kini gikan sa mga kaaway,. Ang iyang pagka-hari dili sabton nga taas o dungganon o tawhanon lamang sama sa politikanhon nga gingharian kondili kini usa ka harianon nga gidumalahan sa gugma, kaangayan ug pagserbisyo sa katawhan

Ang atong Ginoong Jesukristo miingon sa dihang gipangutana siya ni Pilato kung Asa ba ang iyang gingharian? ug siya mitubag nga “ ang akong gingharian dili niining kalibutana kondili atua sa akong Amahan” (Juan 18:36, Mateo 6:9-10). Busa kon atong sabton ang Gingharian ni Jesukristo mao ang espiritohanong Gingharian diin mao kini ang maghari sa katapusan sa tanan ug ang atong Ginoo maoy maghari niini (Mateo 25:31-46). Sumala pa ni Papa Pio XI siya nagaingon sa iyang Encyclical Letter on Christ the King, “Ang pagka-hari ni Kristo diha nagasukad sa dili matugkad nga panaghiusa sa duha ka kinaiya ni Kristo ang Pagka-Dios ug pagka-Tawo o hypostatic union, tungod sa rason sa panaghiusa sa maong kinaiya si Kristo isip adunay Tawo nga kinaiya milabaw sa tanang mga binuhat bisan pa sa labing hataas nga Anghel mosimba ug moalagad kaniya.

Mao nga si San Juan mipamatuod niini nga si Kristo mao ang HARI SA TANANG MGA BINUHAT, tungod ang tanang butang nahimo pinaagi kaniya (Juan 1:3)”. Sumala pa ni San Tomas de Aquino “ All men, unbelievers as well as believers, are completely subject to the sovereign dominion of Christ. All are subject to His Kingship even though some refuse to accept Him as King, or submit to Him. At the end of time Christ’s temporal power will be manifest, and all will submit to his rule willingly or not, to the eternal anguish of those who refused to recognize and submit to His authority during their life on earth.” (III, 59, 4, ad 1). Ang atong mahal nga Santo Papa si Papa Benito XVI namulong nga ang pagka-hari ni Kristo wala gibasi sa tawhanong gahum kondili diha sa mahigugmaon ug maalagaron nga pagserbisyo. Si Ginoong Jesukristo maoy bugtong sumbanan nato sa atong pagpangalagad, kita mangalagad gayud sa atong isigkatawao sama sa gibuhat sa atong Ginoo bisan siya Dios naglalang kanato ug matuod nga Hari sa tanan apan mianhi siya aron moalagad ug wala siya moanhi aron alagaran.

Si Ginoong Jesukristo nagpahimangno kanatong daan nga adunay moabot niining kalibutana nga magpakasama kaniya magpaila nga siya hari, magpaila nga siya Anak sa Dios ug pinili o gidihogan sa Amahan kana usa gayud ka bakak ug pagpasipala ngadto kaniya. Sumala pa ni Kristo Magbantay kita sa kanunay ug dili kita palimbong sa mga mini nga magtutudlo (Mateo 24:4-5, Mateo 7:15-20, 2 Pedro 2:1-3). Ania na sila karon nagpaila nga Anak sa Dios apan ang tinuod sila mga lobo nga maoy motukob kanato ilabi na sa katawhan sa Dios, mopahisalaag lamang kanato (Buhat 20:30). Si Kristo lamang ang tinuod tang Hari, Dios ug Anak sa Dios nga niluwas kanato wala nay lain pang Anak nga ipadala sa Amahan kondili si Ginoong Jesukristo lamang.

Nahuman na ang iyang pag-anhi dinhi sa kalibutan siya nagtudlo na sa kamatuoran, nagtukod na ug Simbahan (Mateo 16:18), aron pagasakopan sa iyang mga katawhan alang sa pagpadayon sa iyang lihok sa pagpangluwas pinaagi sa mga Sakramento nga iyang gitukod ug kining Simbahan mao ang iyang lawas (Efeso 5:23, Col. 1:18). Kon mobalik siya dinhi sa kalibutan, nan, mao na ang katapusang paghukom dili aron mowali pagbalik (Mateo 25:31-40), busa kon adunay moingon nga siya pinili nga anak sa Dios BAKAK KANA.