Ang Adbyento!

(Part 1 of 2)

Karong mga panahona ang tibuok katawhan sa tibuok kalibutan nagapangandam na sa pinaka-dako nga selebrasyon sa kasaulogan ug paghandom sa pagkatawo ni Ginoong Jesukristo o mas ilado sa tawag nga PASKO o Pasko sa Pagkatawo.

Pipila sa atong mga kaigsoonan karon busy na sa pagpangandam. Ang uban aduna nay mga pagpa-ngandam nga mga regalo ug uban pang mga andamonon para sa kasaulogan sa pasko. Bisan gani ang mga kadalanan ug uban mga establisimento adunay daghan na nga mga dekorasyon aron sa pagpakita nga haduol na ang kasaulogan sa Pasko sa pagkatawo ni Ginoong Jesukristo inubanan usab sa mga nindot nga mga sonata o mga alawiton pahinungod sa Pasko.

Apan subo lang pamalandongon nga ang katawhan karon mas nabaling ang atensyon sa sagrado nga kasaulogan sa pagkatawo sa atong Ginoong Jesukristo ngadto sa mga materyal ug kalibutanhon nga mga preparasyon. Natabunan ang pinaka-uyokan nga kahulugan sa maong selebrasyon, hinoon dili dautan kung kita mosaulog sa Pasko sa pagkatawo nga magmaya o inubanan sa pag-gamit sa mga materyal nga butang. Kini mamahimong dautan kung sa maong selebrasyon mas palabihon nato ang butang nga unodnon ug kalibutanhon nga katagbawan lamang.

Mao nga niining higayona na-aghat kami nga hisgutan nato ang tinuod gayud nga kahulogan sa pagpangandam nato sa pagka-tawo ni Ginoong Jesukristo o Advent. Unsa man ang Adbyento? Ang Adbyento gikan sa latin nga pinulongan nga adventus, nga nagkahulugan ug “pagpaabot”(Lucas 3:1-6, 1:26-38 ug Mateo 1:18-25). Usa kini ka kasaulogan nga nag-obserba kita sa pagpaabot ug pagpangandam alang sa kasaulogan sa pagkatawo ni Ginoong Jesukristo sa Pasko (Nativity of Jesus Christ at Christmas). Kini atong saulogon aron sa pag-andam sa atong kaugalingon aron takus kita nga mosaulog sa anibersaryo sa pag-abot sa atong Ginoo nganhi sa kalibutan sa pagka-tawo sa Dios sa Gugma.

Aron ang atong kalag mahimong angayan nga puy-anan sa manunubos diha sa pagpangalawat ug pinaagi sa grasya kita andam usab sa iyang katapusang pagbalik isip maghuhukom, diha sa kamatayon ug sa katapusan sa kalibutan (Isa 42:9, Mt 19:26, Mk 14:36). Ang pagsugod sa Adbyento mao ang panahon diin ang Simbahan naga-butang sa mga simbolo o usa ka lingin nga hinimo sa mga bulak ug dahon ug gibutangan ug upat ka kandila nga adunay upat usab ka nagkalahi-lahi nga kolor o Advent Wreath usa kini ka Tradisyon sa mga Kristohanon nga naga-simbolo sa upat ka Dominggo sa kasaulogan sa pagpaabot ug pagpangandam sa pagkatawo ni Ginoong Jesukristo.