49th KSP-PSL anniversary gi-saulog

Niadtong ika-9 sa Nobyembre gisaulog sa Archdiocese of Davao ang ika-49 nga anibersaryo sa Kasaulogan sa Pulong ug Pangulo sa Liturhiya (KSP-PSL) didto sa UIC Gym, Bajada, Davao City.

Sa homiliya ni Abp. Romulo G. Valles, giingon niya nga ang presensya sa mga PSL timaan sa pagka-buhi sa Gagmay’ng Kristohanong Katilingban.

Sumala niya, bisan karong tuiga lang gisaulog ang Year of the Laity, ang Archdiocese of Davao dugay na naga-atiman sa mga layko sama sa mga PSL—mga pangulo nga naga-alagad sa katawhan.

“Dugay na ta naga-atiman sa mga layko aron sila ma-balaan ug ma-santos,” dugang ni Abp. Valles.

Sa iyang pag-paambit sa wala pa gisugdan ang misa, si Fr. Reynaldo Retardo, vice-rector sa St. Francis Xavier Regional Major Seminary nag-ingon nga ang mga PSL kinahanglan adunay dakong gugma sa Simbahan.

“You must have a deep love for the Church including its weaknesses. PSL’s should love the Word of God and not his own word,” giingon niya.
Giingon usab niya nga kinahanglan nila tun-an ang Pulong sa Ginoo ug tun-an ang mga butang mahitungod sa pagtoong Katoliko aron dili sila madala sa ilang kalibog nga maoy hinungdan nga maminaw sila sa laing sekta.

Dugang usab niya nga ang mga PSL adunay dakong responsibilidad sa ilang tagsa-tagsa ka pamilya dili lamang sa pagkaon kon dili sa espirituhanong bahin sa ilang kinabuhi.

“Make your family a school of holiness,” sumala ni Fr. Retardo.