Viva MARIA! Viva HESUS!

Bulan na usab sa Oktobre karon. Bulan ni Maria, atong Inahan. Ang Birhen sa Santos nga Rosaryo. Ang Birhen sa Fatima.

Malipayon kaayo ako nga nakasaulog sa Santos nga Misa sa Piyesta sa among parokya sa Birhen Sa Fatima sa Davao niadtong Oktobre 13. Oo, Oktobre 13 na ang piyesta sa parokya, human sa daghanng mga katuigan nga gibalhin nila ang kasaulogan sa adlawng Dominggo. Nalipay kaaayo ko nga nabalik na sa dating petsa ug sa saktong pitsa.

Angayan lang gayud nga saulogon nato ang Piyesta sa Fatima sa Oktobre 13 kay kini ang pitsa nga gipili sa atong mahal nga Birhen nga magpakita sa mga kabataan sa Fatima- si Lucia, Francisco ug Jacinta. Daghan sa mga Katoliko bisan ang mga deboto sa Birhen sa Fatima wala mahibalo ang kamakahuluganon sa pitsa 13. Paghandum kini kang Rayna Ester kinsa maoy nagluwas sa iyang mga kadugong Hudiyo gikan sa kamatayon sa kamot sa mga kaaway. Ang Birhen sa Fatima nagpakita kaniadto nagsul-ob og sapot nga anaa makita sa may tiilan sa iyang sapot ang bitoon ni Ester. Kini, matod pa, nagpadayag sa mensahe sa Birhen sa Fatima alang sa kaluwasan sa tibuok kalibutan. Kining mensahe giila karon nga mao ang ‘plano ni Maria alang sa kalinaw sa kalibutan.”

Ang maong plano sa kalinaw nasumada sa tulo ka gimbuhaton nga mao ang 1. Pag-ampo sa Rosaryo matag adlaw , 2. Ang paghinulsol sa salaug pagbag-o sa kinabuhi, 3. Konsagrasyon ngadto Putling kasingkasing ni Maria nga magpalig-on sa atong pagtoo sa Dios og sa patuman sa mga kasuguan sa Dios. Sa ingon, ang mga katawhan uban ang tibuok kabuhaan mahibalik ug mahiuli sa iyang kahusay, kaangayan, kalinaw.

Busa, ang Piyesta sa Birhen sa Fatima ug ang piyesta sa Birhen sa Santo Rosario didto sa Toril ug Malita, maoy higayon nga mahinumduman natong tanan ang dakong mensahe sa Kalinaw gikan sa langit.

MGA MISYONERONG SUMUSUNOD

Ang atong Santo Papa Francisco nagaampo karong bulana nga ang pagsaulog nato sa Wold Mission Sunday sa Oktobre 19, magdasig pa gayod sa tanang mga magtotoo nga moapil ug manlimbasog nga mosaksi sa atong Pagtoo, aron makita, mabati, ug masinati sa katawhan.

Gidasig kita niya nga dawaon ug angkonon ang tahas natong tanan isip mga binunyagan, dili lang magpabilin nga nagatoo sa Dios ug nagasimba, apan ipaambit nato sa tanan kining atong malipayon ug malaumong pagkinabuhi sa atong Pagtoo sa Dios. Kining pagpaambit nato sa atong kasinatian uban kang Kristo maoy ipaambit nato sa uban, sa bisan asang dapit, sa bisan unsang kahimtang, sa bisan unsang higayon, sa matag tawo nga mahibalag sa atong inadlawadlaw nga panaw sa kinabuhi.

Ang mga Laykong sumusunod ni Kriso maoy adunay daghan kaayong lainlain nga higayon sa pagsaksi sa Pagtoo. Kamong mga Layko ang dunay mas daghang higayon nga malipayon ug masaligon nga dalhon ang kahayag sa Pagtoo n gadto sa mga pamilya, sa mga kasilinganan, sa mga nagkalilaing propisyon, sa mga politiko ug ubang mga awo nga nangalagad sa publiko, sa mga negosyante, sa mga mamumuo, sa mga maguuma ug mangingisda, ubp.

MINDANAO SULU PASTORAL CONFERENCE

Iampo nato ang kalampusan sa ipahigayon nga panagtagbo pastoral sa mga delegado gikan sa 21 ka mga diyosesis sa tibuok Minadanao didto sa Zambaoanga City karong Okobre 20-24, 2014. Kining taliabot nga Mindanao Sulu Pastoral Conference maoy ika-15 na nga panagtigom.