Pulong sa Kinabuhi

Oktubre 2014

“Ako mao ang pan nga naghatag sa kinabuhi. Ang moari kanako dili na gayod gutomon; ang motuo kanako dili na gayod uhawon.” (Juan  6:35)

Gisaysay ni Juan sa iyang Ebangelyo nga human sa milagro sa pagpadaghan sa pan, miadto si Jesus sa Capernaum, ug didto sa iyang paghisgot bahin sa pan sa Kinabuhi, miingon Siya: “Ayaw kamo paghago alang sa kalan-on nga madunot kondili sa kalan-on nga molungtad ngadto sa kinabuhing walay kataposan nga ihatag kaninyo sa Anak sa Tawo” (Juan 6:27).

Alang sa mga naminaw kaniya, tataw kaayo nga naghisgot Siya bahin sa mana, ingon man sa “ikaduhang” mana nga sa panahon sa Mesiyas, manaug gikan sa Langit. Dinhi aning pakigpulonga, mipaila si Jesus sa mga tawo, nga wala pa makasabot  nga Siya mismo ang matuod nga pan nga nanaug gikan sa Langit ug nga angay’ng dawaton pinaagi sa pagtuo.

“Ako mao ang pan nga naghatag sa kinabuhi. Ang moari kanako dili na gayod gutomon; ang motuo kanako dili na gayod uhawon.”

Siya ang pan: mao ni ang pagpasabot ni Jesus sa iyang kaugalingon. Nan, mao usab kini ang kataposang tuyo sa iyang kinabuhi dinhi sa yuta: nga Siya mahimong pan aron kan-on. nato; mahimo Siyang Pan aron makapaambit kanato sa Iyang kinabuhi, aron mabag-o ug mahisama kita Kaniya. Kutob dinhi ang espiritohanong gipasabot niining mga pulonga; klarong sabton tungod sa kalambigitan niini sa Daang Kasabotan. Apan nahimo kining katingalahan ug lisod subayon sa dihang midugang Siya pag-ingon:  “Ang pan nga akong ihatag mao ang akong unod aron mabuhi ang kalibotan” (Jn. 6:51) “Kon dili kamo mokaon sa unod sa Anak sa Tawo ug dili moinom sa Iyang dugo dili kamo makabaton ug kinabuhi.” (Jn 6:53)

Nagpahibalo siya mahitungod sa Yukarestiya nga naka-eskandalo ug nakapahilayo sa daghan Niyang mga tinun-an. Apan mao kini ang labing dakong gasa nga buot ihatag ni Jesus ngadto sa katawhan: ang Iyang pakighiusa kanato diha sa Sakramento sa Yukarestiya nga makatagbaw sa kalag ug lawas, ug makahatag kanato ug hingpit nga kalipay. Kon mokaon ta niining pan, dili na kita batio’g kagutom kay ang atong kauhaw sa gugma ug kamatuoran tagbawon man Niya, kinsa mao mismo ang Gugma ug ang Kamatuoran.

“Ako mao ang pan nga naghatag sa kinabuhi. Ang moari kanako dili na gayod gutomon; ang motuo kanako dili na gayod uhawon.”

Samtang dinhi pa ta sa kalibotan, pinaagi aning pan, gipakaon ta sa Iyang kaugalingon; apan gihatag kini kanato aron sa atong bahin makahatag ta’g katagbawan sa espiritohanon ug materyal nga kagutom sa katawhan libot kanato. Gisangyaw si Kristo sa kalibotan,  dili pinaagi sa Yukarestiya kondili pinaagi sa kinabuhi sa mga Kristyanos nga gibuhi  sa Yukarestiya ug sa iyang mga Pulong. Gisangyaw nila ang Ebangelyo dinha sa ilang mga kinabuhi ug sa ilang mga pulong nga maoy makadala sa presensya ni Kristo taliwala sa katawhan. Ang kinabuhi sa Kristohanng katilingban, tungod sa Yukarestiya, nahimong kinabuhi ni Jesus, busa makapaambit sila sa gugma ug kinabuhi sa Dios ngadto sa uban.

“Ako mao ang pan nga naghatag sa kinabuhi. Ang moari kanako dili na gayod gutomon; ang motuo kanako dili na gayod uhawon.”

Dinhi niining pasumbingay sa ‘pan’, si Jesus nagtudlo kanato sa labing matuod, labing Kristohanong pamaagi sa paghigugma sa isigkatawo. Unsa man gayod ang buot ipasabot sa paghigugma? Ang paghigugma nagpasabot sa ‘pakig-uyon o pakighiusa sa atong kaugalingon’: pakighiusa diha sa unsay ilang gusto, gikan sa labing gamay ug dili importanteng mga butang, nga tingale  alang kanato walay pulos apan alang kanila mahinungdanon kaayo. Si Jesus naghatag  kanato ug dakong panig-ingnan aning maong paagi sa paghigugma diha sa paghimo sa iyang kaugalingon isip  ‘pan’ alang kanato. Aron makasulod  Siya sa tagsatagsa kanato,  gihimo Niya ang iyang kaugalingon isip pan aron mahimong kalan-on, aron mahiusa Siya sa matag usa, makaalagad, aron ang tanan makatagamtam sa Iyang gugma. Mao nga kita usab kinahanglan gayod nga mahiusa ngadto sa uban hangtod nga ang atong kaugalingon mahimong “makaon.”  Kini mao ang gugma: ang pakighiusa nato sa uban sa pamaagi nga mabati nila nga gipabusog sila sa atong gugma, nga gihupay sila, nga gipagaan ang ilang kasingkasing, nga nasabtan nato sila.(Chiara Lubich)