Setyembre 8, adlaw’ng natawhan ni Birheng Maria!

(Ang papel ni Birheng Maria sa atong kaluwasan) (Part 1 of 3)

Sukad pa sa unang siglo, ang debosyon sa Mahal nga Birheng Maria mao ang pinaka-una nga elemento sa espiritohanong kinabuhi sa kadaghanang Kristiyanos, ilabi na sa pagtoong Katoliko. Gikan sa Konsilyo sa Ephesus niadtong tuig 431 A. D. hangtud sa ikaduhang konsilyo sa Vaticano ug sa encyclical nga sulat ni Papa Juan Pablo II nga giulohan ug Redemptoris Mater, si Birheng Maria giila dili lang Inahan sa Dios (Θεοτόκος Theotokos), kondili giila usab siya nga Inahan sa Simbahan, tigpataliwala sa katawhan ngadto sa iyang Anak nga si Ginoong Hesukristo o Mediatrix ug nakatabang sa pagbuhat sa pagpangluwas o Co-Redemtrix.
Sumala sa tradisyon, si Birheng Maria natawo sa Nazareth,Galeliya gikan kang San Joaquin ug Santa Ana sa Septembre 8. Kini gipauswag ni Papa Sergius I sa tuig 687 A.D., ug gitohoan nga gianak ni Birheng Maria ang Ginoong Jesukristo sa 16 anyos ang iyang panuigon. Sa iyang talagsaong gasa ug pagka-Inahan ni Kristo, Dios-Tawo ug manluluwas, aduna siyay talagsaong uyamot nga lugar sa Simbahan ug kanatong tanan.
Siya adunay lalom nga panag-uban ni Jesukristo sa pagbuntog sa sala ug ni Satanas (Genesis 3:15) ug nahimong kabulig ni Kristo sa pagluwas sa kalibutan (Galacia 4:4, Lucas 2:34-35) tungod sa paglitok ni Maria ug “fiat” o “yes Lord o Oo Ginoo o matuman ang imong pagboot”, sa mensahe sa Anghel nga ang Pulong mahimong unod ug iyang pagasabakon.
Nahimo siya dili lang Inahan sa Dios, tungod lang sa tawhanong han-ay sa kinaiyahan, kondili tungod usab sa espirituhanong han-ay. Uban sa grasya sa Dios nahimo siyang Inahan sa tanan (Lucas 1:26-38, Juan 1:1,14). Busa ang Simbahan ni Kristo dinhi sa kalibutan lig-on nga nagtudlo kanato nga mohatag kita ug taas nga debosyon, pagtahud ug pagdayeg kang Birheng Maria kay “diha sa mensahe sa anghel nadawat niya ang pulong sa Dios nganha sa iyang kasingkasing, ug sa iyang lawas ug naghatag ug kinabuhi sa kalibutan, diin gipasidunggan siya ug gitahod isip tinuod gayud nga Inahan sa Dios ug Inahan sa manluluwas. Tungod usab niini nga mga pag-asoy siya usab nahimong pinalanggang anak sa Amahan ug Templo sa Espiritu Santo. Tungod sa maong gasa sa pinakataas nga grasya siya milabaw sa tanang mga binuhat, sa langit ug sa yuta.