PULONG SA KINABUHI

Septyembre 2014

“Busa, alang sa himaya sa Dios, dawata ang inyong isigkamagtutuo ingon nga gidawat kamo ni Kristo.” (Rm 15:7)

Mao ni ang kataposang sugyot ni San Pablo diha sa iyang sulat sa mga Kristyanos sa Roma. Ang mga magtutuo sa Roma sama sila sa mga magtutuo nga nakatag sa tibuok kalibotang Greko-Romano, nga kasagaran kaniadto mga pagano ug ang uban mga Judio. Mao nga diha nianang pundoka nagtagbo ang nagkalainlaing panghunahuna, kultura, ug panglangtaw espiritohanon. Nan, dili kalikayan nga nahimo ning tuboran sa kinaiya sa paghusga, pagpanglibak ug panaway, pagbinantayay, pagpiliay kinsay angayan o dili, ang pagkawalay pasyensya ug pagsabot sa usag usa. Klaro nga kining maong pamatasan sukwahi gayod sa kabubut-on sa Dios nga mao ang pagtinagdanay ug pagdawatay sa usag-usa.

Aron matabangan sila sa pagsumpo aning maong pamatasan, ang kinamaayong pamaagi nga nakit-an ni Pablo mao ang pagpahinumdom nila sa grasya nga ilang nadawat adtong nahimo silang mga Kristyanos; adtong gitawag sila ni Kristo ug gipaambit sila sa gasa sa Espirito Santo. Mao ni ang tim-os nga timaan sa gugma ni Jesus para kanila diha sa pagdawat ni Jesus sa tagsatagsa kanila. Bisag unsa pay ilang kaagi, bisan unsa kalahi sa ilang gigikanan, gidawat sila ni Kristo aron paghimo kanila isip usa lamang ka Lawas.

“Busa, alang sa himaya sa Dios, dawata ang inyong isigkamagtutuo ingon nga gidawat kamo ni Kristo.”

Kining mga pulong ni San Pablo nagpahinumdom kanato bahin sa usa sa mga mahinuklogong hiyas sa gugma ni Jesus samtang nagpuyo pa Siya dinhi sa yuta; gidawat Niya ang tagsa tagsa kanato, ilabina kadtong mga sinalikway sa katilingban, ang mga kabus, kadtong mga layo kaayo sa Dios. Mao kini ang gugmang gibati ni Jesus sa pagtanyag niya sa tanan sa iyang pagsalig, paglaum, ug pakighigala. Tungod niini, hinayhinay Niyang gigun-ob ang mga babag nga natukod sa pagkamapahitas-on ug pag-iya-iyahay sulod sa katilingban niadtong panahona.

Diha ni Jesus gipadayag ang Gugmang bug-os ug mahinangpon sa Langitnong Amahan alang sa tagsatagsa kanato; busa, mao usab unta kini ang gugma nga angay natong ipakita sa atong isigkatawo. Mao kini ang kinaunhang kabubut-on sa Amahan alang kanato. Tungod niini, walay mas dakong himaya nga atong mahalad sa Amahan kondili ang himaya sa pagpaningkamot ug pagdawat sa usag usa sa pamaagi nga gipakita ni Kristo diha sa Iyang pagdawat sa matag usa kanato.

“Busa, alang sa himaya sa Dios, dawata ang inyong isigkamagtutuo ingon nga gidawat kamo ni Kristo.”

Unsaon nato pagpuyo ang Pulong sa Kinabuhi niining bulana? Nagdani kini sa atong atensyon sa usa sa timaan sa atong pagka-maako-akohon nga kasagaran maoy kinalisdang santaon: ang kinaiya nga buot ta mag-inusara; mobiya sa pundok; pagpili kon kinsay angayan ug kinsay dili; pagbiaybiay sa uban daw wala silay katungod nga mahi-apil sa grupo tungod kay lahi ra sila kanato ug basin unya makadisturbo ug makasamok.
Sulayan nato karon ug puyo kining Pulong sa kinabuhi, una sa tanan diha sulod sa atong kaugalingong pamilya, sa atong mga kapunongan, sa atong mga katilingban, mga kagrupo sa trabaho. Pugngan nato ang atong kaugalingon sa pagpanaway sa uban, dili nato hukman ang uban kon kinsay angayan o dili, ang pagbinantayay, ang kaligotgot, ang pagdumot ug paglikay niini o nianang tawhana, nga sayon ra gayod ug kasagaran natong gibuhat. Mao man kini ang makapabugnaw ug makabalda sa atong pagpakig-uban kanila. Mobabag kini ug makapa-ungot sa atong paghigugmaay sa usag usa.

Ug unya diha sa katilingban, paningkamutan nato pagsaksi sa paghigugma ni Kristo nga andam kanunayng modawat sa bisan kinsang tawo nga sa pagbuot sa Ginoo ibutang sa atong atubangan, ilabina kadtong mga tawo nga tungod lagi sa katilingbanong pag-iyaiyahay, sayon rang abogon ug isalikway.

Ang pagdawat sa atong isigkatawo nga lahi ra kanato maoy sukaranan sa Kristohanong paghigugma. Mao kini ang sinugdanan, ang kinaunang ang-ang alang sa pagtukod sa usa ka sibilisasyon sa Gugma, sa usa ka Kultura nga maki-angayon ug manggihatagon ug gitawag kita ni Jesus sa pagtukod niini ilabina gayod karong mga panahona.

(Chiara Lubich)