Kanus-a man saulogon ang liturhiya?

P: Unsa man ang sentro sa liturhikanhong panahon?

T: Ang sentro sa liturhikanhong panahon mao ang Domingo, ang pundasyon ug sukaran sa tibuok liturhikanhon nga tuig; ang kinatumyan niini mao ang tinuig nga kasaulogan sa Pasko sa Pagkabanhaw, ang pangilin sa mga pangilin.

P: Unsa man ang tulumanon sa liturhikanhong tuig?

T: Sulod sa liturhikanhong tuig ang Simbahan nagasaulog sa tibuok misteryo ni Cristo sukad sa iyang Pagkahimong Tawo hangtod sa iyang pagkbalik sa himaya. Sa tinakda nga mga adlaw ang Simbahan nagpasidungog uban sa talagsaong gugma sa Bulahan nga Birhen Maria, ang Inahan sa Dios. Ang Simbahan nagsaulog usab sa mga handomanan sa mga santos nga nagkinabuhi alang kang Cristo, nga nag-antos uban kaniya, ug nagapuyo uban kaniya sa himaya.

P: Unsa man ang Liturhiya sa mga Oras?

T: Ang Liturhiya sa mga ORas nga mao ang publiko ug komon nga pag-ampo sa Simbahan, pag-ampo ni Cristo uban sa iyang lawas, ang Simbahan. Pinaagi sa Liturhiya sa mga Oras ang misteryo ni Cristo, nga atong gisaulog diha sa Eyukaristiya, nagabalaan ug naga-usab sa kinatibuk-an sa matag adlaw. Gilangkoban kini labina sa mga salmo, ubang mga teksto sa Bibliya, ug mga basahon gikan sa mga unang Amahan sa Simbahan ug mga espirituhanong magtutudlo. (Cf. Kompendiyo sa Katesismo sa Simbahang Katoliko, 241-243)