Draft sa GKK Norms and Policies gihashasan

Human sa kalampusan sa gipahigayong Archdiocesan GKK Gathering niadtong Mayo niining tuiga, nakahimo ang mga kaparian ug pipila ka layko sa Dabaw og draft sa GKK Norms and Policies ug kini kasamtangang gina-hashasan.

Sa pagpangulo ni Archbishop Romulo G. Valles ug Bishop George B. Rimando, gipaklaro ang mga butang nga nahisulat sa draft mahitungod sa mga functions ug roles sa mga lideres sa mga Gagmay’ng Kristohanong Katilingban (GKK) ug unsa ang ilang organizational structure.

Ang draft bunga sa pipila ka mga data gathering ug validation sa parochial level ug vicariate level. Gi-collate ang maong data ug gi-himo ang draft sa himoong bag-ong GKK Norms and Policies sa Archdiocese of Davao.

Usa sa mga nahisgutan mao ang mga kasinatian ug mga problema sa pagdumala sa mga GKK aron adunay leveling-off sa mga kasinatian sa mga parokya aron mahan-ay ang GKK norms and policies.

Giplastar usab ang mga kaakuhan sa matag lider sama sa Pangulo sa Katilingban (PSK) diin gina-dili na sa pagdumala og lain pang katungdanan sulod sa Simbahan.

Apil usab sa nahisgutan ang katungdanan sa Pangulo sa Liturhiya (PSL) nga mao ang adunay katungdanan sa liturhikanhong kinabuhi sa iyang katilingban.

Gilauman nga mahuman ang maong panaghisgut ug pag-hashas sa draft sa GKK Norms and Policies aron mahimong epektibo ang pagpadagan sa mga programa sa Simbahan ilabi na dinha sa GKK level. Ang maong panagtapok gihimo sa Archbishop’s Residence sa dalang Torres niadtong Agosto 29.