Diyosesis sa Mati gibalik-lantaw ang buhat sa mga misyonaryo

MATI CITY—Sa pagsaulog sa ika-117 nga kapistahan sa katedral ni San Nicolas de Tolentino niining syudad, gibalik-lantaw sa katawhan ang mga gihimo sa mga misyonaryo sa Diyosesis sa Mati.

Niadtong Setyembre 10, sa Misa nga gipangulohan ni Bishop Patricio Alo sa Mati, diin ang Arsobispo sa Dabaw nga si Archbishop Romulo G. Valles maoy naghatag og pagpaambit, giingon niya nga bulahan ang Mati tungod sila naga-gunit sa kalig-on sa pagtoo.

“All these years nagpakita kita, ang atong mga katigulangan sa pagpalig-on sa Katolikong pagtoo,” giingon ni Abp. Valles.
Niadtong 1936 nahimong parokya ang San Nicolas de Tolentino nga kaniadto kabahin pa sa Diocese of Zamboanga.

“Una nahimong parokya ang Mati, adunay galihok aron mapahibalo ang Pulong sa Diyos,” sumala ni Abp. Valles, nga nagtudlo sa mga misyonaryo nga Augustinian nga nag-silbi sa mga katawhan sa Mati.

Dugang usab niya nga dili sayon ang mahimong misyonaryo. Kaniadto, kung ang usa ka tawo mag-misyon, gikonsidera na siyang patay ug dili na mubalik.

“Unsay nagatulod sa mga misyonaryo nga muanhi diri sa Mati? They found faith, relationship with God isip good news,” giingon ni Abp. Valles.
“Faith is Good News,” dugang niya.

Ang kapistahan ni San Nicolas de Tolentino usa ka tinuig nga selebrasyon sa tibuok syudad sa Mati. Ginasaulog kini matag Setyembre 9 hangtud 10 sa tibuok diyosesis.