Vocation Month saulogon sa Dabaw

Saulogon sa Archdiocese of Davao ang bulan alang sa bokasyon karong Setyembre.

Ilunsad ang maong selebrasyon pinaagi sa Santos nga Misa nga saulogon ni Archbishop of Davao Romulo G. Valles karong Agosto 29, 2:30 sa hapon didto sa San Pedro Cathedral kauban ang mga kaparian nga diyosesano ug relihiyoso, mga kamadrehan ug mga brothers, ug mga layko.

Sa iyang circular letter niadtong Agosto 6, gi-awhag ni Abp. Valles ang mga kaparian, Catholic school heads, ug mga youth coordinators sa Archdiocese of Davao nga suportahan ang mga kalihukan nga adunay kalambigitan sa kasaulogan sa Vocation Month.

Usa sa mga kalihukan nga ginahimo sa tibuok archdiocese mao ang paghimo sa vocation campaign sa mga skwelahan diin maila-ila sa mga kabatan-onan ang nagkalain-laing religious congregations sa mga babaye ug lalake aron ma-awhag sila nga mahibaw-an ang ilang bokasyon.

Ang kampanya nagahisgot usab sa paghimo ug vocation search-in sa diyosesano nga mga seminaryo ug mga balay sa mga religious congregations.

Sa vocation campaign usab ipasabot sa mga kabatan-onan ang tulo ka klase sa bokasyon: pagka-pari o relihiyoso, kaminyoon, ug pagka-single blessed.

Si Abp. Valles nag-awhag usab nga makig-coordinate sa Archdiocesan Vocation Director ug Chairperson sa Davao Chapter of Vocations for the Philippines (DVP-Davao) nga si Fr. Elvie Bordios alang sa mga kalihukan nga himoon sa parokya ug mga skwelahan alang sa pagsaulog sa Vocation Month nga angay hatagan og importansya.

Sa iyang pagtapos sa iyang circular, mao kini ang giingon ni Abp. Valles: “The harvest is plenty but the workers are few. Therefore ask the Lord of the harvest to send out workers into His harvest. (Mt. 9:37-38)”