Sa Peligro, Kang Kristo Kita Makasiguro

Ikanapulo’g Siyam nga Domingo sa Ordinaryong Panahon
1 Hari 19:9, 11-13/ Ps. 85:9-14/ Rom. 9:1-5/ Mt. 14:22-33

Nakasulay ka na ba og latay sa alambre o sa pisi? Nakasulay ka na ba og lakaw ibabaw sa tubig? Kining mga buluhatona peligro ug lisud himuon.

Ang Simbahan sa panahon ni San Mateo nakasinati sa mga peligro nga daw naglatay sa alambre o pisi o kaha naglakaw sa tubig nga posibleng malunod sa oras nga wala hibaw-i. Apan kining maong Simbahan gidasig diha sa pagsalig kang Kristo.

Ang maong Simbahan hangtod karon namiligro. Daghang mga magtutoo nawad-an sa pagsalig tungod sa mga pagsulay. Daghang kabatan-onan nalunod sa temtasyon sa media ug modernong hitsas sa komunikasyon. Daghang mga pamilya nabungkag. Dunay mga tawo nga nawad-an sa pagsalig sa atong mga lideres, sa simbahan man o gobyerno, tungod sa korapsyon ug abuso.

Apan luyo sa mga peligro, kang Kristo kita makasiguro. Ang Ginoo kanunay nagtanyag sa kahigayonan nga kita mabuhi nga puno sa pagsalig ug pagtoo. Sa atong mga pamilya, matag ginikanan naningkamut nga sa ilang anak makapaeskwela. Sa atong katilingban, daghan mahinangpong nagpaabot sa senimanang pag-ampo dihni sa atong kapilya. Sa Simbahan sa Davao 50 na katuig ang seminaryo mayor nga hangtod karon gitunghaan sa mga buot magpari aron sila mahulma. Sa atong palibot, mga establismento masudlan pa’g trabaho alang sa mga interesado. Kini pipila lamang sa mga kamatuoran nga maglig-on kanato nga taliwala sa mga peligro ang Dios ania diay gihapon nanalangin kanato.

Atong paningkamutan nga uban kang Kristo, makahimo kitang makalakaw diha sa mga peligro bisan kita mobati nga kita huyang ug naluya na. Kabahin sa atong pagka-tinun-an nga mosalig dili sa atong kahanas ug kasinatian apan diha lamang kang Kristo. Dili nato tugotan nga malup-og sa mga pagsulay kondili mosalig sa Dios nga kanato naglig-on kanunay.