Sa Pagsalig, Kadaugan

Ika-20 nga Domingo sa Ordinaryong Panahon
Is. 56:1, 6-7/ Ps. 67:2-3, 5-6, 8/ Rom. 11:13-15/ Mt. 15:21-28

Sa wala pa mudaug si Lyka sa “The Voice”, wala gayod kaayo motagad kaniya sa iyang pagpamasura. Pero karon daghan na kaayong magpakuha og litrato kaniya kay sikat naman siya.

Kining babaye nga taga Canaan nahisakop sa mga tawo nga puno sa pagsimba sa mga diosdios ug nahimong hulga sa mga taga Isral sa ilang panahon. Mao nga sila wala ginatagad ug gilikayan gani sa katawhan aron makalikay sila sa posibleng impluwensiya.

Apan bisan sa iyang pagkaubos sama sa iro lamang, iyang gipakita ang dakung pagsalig kang Kristo nga bisan mumho na lang sa grasya sa Dios daku na ang kalipay niya sa maong pananbang. Wala siya mohunong sa paghangyo tungod sa iyang pagsalig nga ang Dios maminaw gayod kaniya. Gani iyang  gidaug sa Kristo sa argumento bisan sa iyang kayano.

Tungod niini, si Kristo nakakita sa daku niya nga pagsalig. Siya gihatagan sa iyang gipangayo.

Sa atong mga paningkamot sa kinabuhi, mahimo nga dili kita ang sentro sa pagtagad sa ubang tawo tungod kay dili kita taas sa kahibalo o inila sa kadaghanan. Mahimo nga dili kita importante atubangan sa kadaghanan kay kita kabus ug dili impluwensiyal sa katilingban. Mahimo nga wala kaayo mamati sa atong mga huna-huna o dili lamang kita panumbalingon kay kita ubos lamang sa mata sa katilingban.

Apan sa atong panginahanglan ang Dios mohatag kanato kung magpadayon kitang masaligon. Bisan mumho na lang sa iyang kahibalo o grasya Iya gayod kita nga lig-onon. Kung moduol lamang kita kaniya aron magpakitabang, ang Dios motagad gayod kanato. Dili makaako ang Dios nga dili mobahin kanato sa Iyang dakung grasya bisan mumho lamang.

Kitang tanan dalhon sa Dios ug hiusahon aron magmalipayon ngadto sa Iyang balay alampoanan. Ang Iyang balay alang kanatong tanan. Busa magmasinugtanon gayod kita sa Dios ug motagad sa tanan. Sama kang Lyka, dili kita mohunongsa pagsalig kay ang moundang dili gayod mudaog ug ang modaug dili gayod moundang. Sa pagsalig, kadaugan.