Pagtuo lang ba aron kita maluwas

Good Morning Brothers in Christ, Mangutana lang ko mga Brod kung husto ba nga Pagtuo lang gikinahanglan aron kita maluwas sama sa ginasangyaw karon sa atong mga kaigsoonan sa gawas nga pagtuo…. Daghang salamat! Ako diay si Brod Michael of Buhangin, Davao City.

Dili lamang pagtuo maoy basihan aron kita maluwas. Usa lamang siya sa mga gikinahanglan. Diha sa Bibliya si San Pablo nag-ingon, “Gantihan sa Dios ang tagsa-tagsa sumala sa iyang binuhatan. May mga tawo nga nagpadayon pagbuhat ug maayo ug nagtinguha sa himaya sa kadungganan. Ug sa kinabuhing walay katapusan hatagan sila sa Dios sa kinabuhing dayon” (Roma 2:6-7).

Busa dili lang sa pagtuo kita pagahukman kondili sa binuhatan usab. Kay si Apostol Santiago nagapasidaan kanatong tanan siya miingon “Mga igsoon, unsay kapuslanan kon ang usa ka tawo moingon nga siya may pagtuo apan wala siyay mga maayong buhat? Makaluwas ba kaniya ang iyang pagtuo? Dili gayud! … Kay ingon nga ANG PAGTUO KUNG WALAY BUHAT PATAY USAB” (Santiago 2:14,26).

Busa dili lamang simpleng pagtuo o pagdawat kang Hesukristo nga imong personal nga manluluwas, luwas kana. Aron makuha nato ang hingpit nga kaluwasan mao kini : 1) PAGTUO (cf. Marcos 16:16), 2) paghinulsol sa mga Sala (cf. Buhat 8:19), 3) PAGHIGUGMA SA DIOS UG PAGTUMAN SA IYANG KABuBOT-ON (cf. Juan 14: 12, 15), 4) PAGSALIG SA TABANG SA GRASYA SA DIOS, PAGDAWAT SA MGA SAKRAMENTO UG SA LAWAS UG DUGO NI KRISTO (cf. Juan 15:5, 2 Timoteo 4:18, 1 Corinto 10:16, Juan 6:50-56), 5) pagpasakop sa matuod nga iglesia o Simbahan (cf. Juan 10:9, Mateo 16:18, Colosas 1:18, Efeso 5:23), 6) PAGPAAMBIT SA EBANGHELYO NGADTO SA UBAN (cf. 1 Timoteo 4:13-16), ug 7) PAGPADAYON HANGTUD SA KATAPUSAN O PRESEVERANCE (cf. Mateo 24:13, Pinadayag 2:10). Mao kini ang pamaagi aron makab-ot nato ang hingpit nga kaluwasan pinasikad gayud diha sa kasulatan.