Ilha si Kristo

Ika-21 nga Domingo sa Ordinaryong Panahon
Is. 22:15, 19-23/ Ps. 138:1-3, 6, 8/ Rm. 11:33-36/ Mt. 16:13-20

Dunay mga tawo nga nailhan nato dili tungod sa ilang pagka-sila kondili tungod sa tawong mas inila nga nauna kanila. Pananglit moingon kita, siya diay si Dodong nga anak ni Pedring nga panday, o siya diay si Inday nga anak ni Conching nga namaligya og mani nga halang, o siya diay ang igsoon sa mayor o ig-agaw sa kongresman.

Ang mga tawo nakaila kang Kristo nga mao si Elias o si Juan nga Magbubunyag o usa sa mga propeta. Wala siya mailhi sumala sa Iyang pagka-siya gayod. Kita kaha nakaila ba kita kang Kristo sumala sa atong kasinatian Kaniya sa dihang naamguhan ta ang gasa sa kinabuhi o kalampusan sa pagtuon o sa grasya sa trabaho o pamilya? Basi ang atong pag-ila Kaniya sumala lang sa gisulti sa uban o sa atong nadungog sa mga pagtulon-an? Kinahanglan usab natong ilhon ang Iyang pag-uban kanato sa atong mga kasinatian sa kinabuhi, kasakit man o kalipay, kapakyasan man o kalampusan.

Si Pedro nakatubag kinsa si Kristo dili tungod sa iyang kahawod kondili tungod sa pagpadayag sa Ginoo. Wala niya mailhi si Kristo tungod sa iyang lalom nga pangisip kay si Pedro yano man lamang nga mananagat. Apan gasa kaniya sa Dios ang kaalam nga nag-abli kaniya sa pagdawat ni Kristo isip manluluwas o Mesiyas nga pinadala sa Dios.

Kinahanglan usab nato nga makadawat sa maong pagpadayag aron mas mailhan nato sa personal nga kinabuhi ang atong Dios nga nagpasakit alang kanato. Kini mahitabo kung kita mogahin og panahon sa pagpalalom sa atong pagtuo. Daghang mga kahigayonan diin kita makapamalandong sa Iyang pagka-Dios alang kanato. Kung kita mainampuon, kugihan nga motuon sa Iyang buhing pulong sa Bibliya, moapil sa mga pormasyon ug seminar nga gipahigayon sa GKK ug parokya, nan sagad nga moabot kanato ang pagpadayag sa buhing Dios.