Hesukristo: Matuod nga Dios ug matuod nga Tawo

Good day Brothers in Christ, Mangutana lang ko kung si Ginoong Hesukristo ba matuod ba gayud siya nga Dios kay ingon man gud sa mga Iglesia ni Kristo si Hesus daw Tawo lamang. Salamat ug nanghinaut ko nga inyong tubagon ang akong pangutana. I’m Alvin of Matina, Davao City.

Usa sa mga sekta nga nagtoo ug midawat kang Hesukristonga manluluwas apan nagwali nga lahi sa giwali sa mga Apostoles kaniadto ug wala modawat nga si Kristo Dios, mao ang pundok nga gitukod ni Felix Manalo niadtong July 27, 1914 sa Punta Sta. Ana Manila, ang Iglesia ni Cristo (INC) (Cf. Encyclopedia of the Philippines By: Zoilo Galang ).

Sila maisugon nga nagwali bahin kang Kristo nga usa lamang ka tawo. Husto nga si Kristo tawo apan dili lonlon tawo lamang kondili Dios siya nga nagpakatawo aron pagluwas kanato (cf. Juan 3:16 ug Juan 1:1,14). Samtang ang atong Ginoo dinhi sa kalibutan, siya gisilutan ug gibutang-butangan sa mga tawo nga wala moila kaniya, gilansang  sa Krus tungod sa pasangil nga nagapasipala siya sa Dios tungod sa pag-angkon niya nga siya Dios ug para kanila usa kana ka dako nga salaod.

Sa kasaysayan sa Kristyanismo nilibo ang nahimong martir tungod niining pagtooha nga si Kristo Dios. Daghang mga Emperador sa Roma ang naningkamot nga patyon kining pagtooha, apan ang Roma na hinoon ang nahimo nga sentro niini.

Minilyon ang ginagasto sa mga pipila ka mga pundok tinuhoan ilabi na ang Iglesia ni Kristo (Manalo) sa ilang programa, ma-radyo o telebisyon man aron ipadayag nga si Cristo tawo lamang ug dili Dios ug kini ilang gipaningkamotan para mapamatud-an nga kini nakasulat daw sa Bibliya. Gatusan na ang mitoo sa ilang propaganda.

Ang Pagka-Dios ni Kristo dili lahi sa Amahan, Usa ra sa Pagka-Dios (Juan 10:30). Ang Dios Amahan, sa Isaias 43:13 nag-ingon “AKO MAO SIYA.” Kinsa man ni nga SIYA ang gipasabot? Ang Dios Amahan gihapon ang mitubag niini diha sa Heb. 1:8. “Ang Dios miingon sa iyang Anak diha sa imong Trono O Dios molungtad hangtud sa kahangturan.”

Busa ang Dios Amahan miila nga si Kristo Dios usab sama kaniya. Ug bisan pa ang mga Apostoles nagpamatuod nga si Kristo Dios mabasa sa Tito 2:13- Si Kristo dakong Dios ug manluluwas, Roma 9:5- kaliwat siya sa mga Patriyarka… Siya ang matuod nga Dios dalaygon hangtud sa kahangturan, 1 Juan 5:20- kini ang matuod nga Dios… Ug bahin usab sa pag-ingon nga si Kristo miangkon sa Amahan nga Dios (Juan 17:3).

Timaan kana sa iyang pagpaubos kay siya nahimong tawo ug nakig-uban sama kanato (Juan 1:1,14), ug sa Filipos 2:6-wala siya nakigtupong sa Amahan bisan siya Dios. Busa wala magpasabot nga mitawag siya ug Dios sa Amahan nawala na usab ang iyang pagka-Dios. Ang kamatuoran si Kristo Dios ug tawo nga matuod.

Sumala sa Mateo 24:4-5, busa magbantay kita kanunay kay daghan ang nagawali karon nga mopahisalaag kanato, ilabi na sa pag-ila sa Dios nga maoy niluwas kanato, himoon nilang Tawo, usa ka dakong pagpasipala kanatong mga matuod nga Kristyano.