GKK San Roque- Kadayawan ug ang iyang pag-tubo

Kung ang pagpanga-lagad matinud-anon, mapa-ilubon, malahutayon, ug si Kristo kanunay ang sentro sa serbisyo ang iya gayong katilingban mag-malambuon.

Ang katilingban sa San Roque-Kadayawan natukod niadtong tuig 1993 sa NHA Subdivision, Bangkal, Davao City. Pinaagi sa “bayanihan” sa mga unang opisyales sa NHA Kadayawan Homeowners Assn. natukod ang nag-inusarang kapilya alang sa NHA phase-1, 2, 3 ug 4. Mokabat ug mga 3,000 ka mga panimalay ang sakop. Ang unang pista gihimo Agosto 16, 1993 atol sa selebrasyon sa “Kadayawan” sa  Davao.

Sanglit ang mga opisyales sa Homeowners man ang nag-mugna sa maong struktura, naningkamot ang mga Katoliko nga lederes sa pagpahigayon ug CLFS Seminar sa Dolor Elementary School. Nagpili sila ug mga mamahimong mga ministriya ug opisyales aron modumala sa GKK ug gisundan sa mga” basic seminars” nga gihimo didto sa San Pablo Parish.

Sanglit dako man kaayo ang ginsakpan sa maong GKK, ang taga NHA phase-2 naningkamot usab sa pagtukod sa laing katilingban nga mao ang Christ the King GKK, ug misunod usab pagmugna ang Phase-3 ug laing 2 ka GKK nga mao ang: Holy Rosary GKK ug Immaculate Concepcion-Kadayawan GKK.

Sulod sa 4  katuig (1993-1997) nakamugna ug 4 ka GKK  ang NHA Kadayawan.  Apan wala mohunong ang trabaho sa Espiritu Santo kay niadtong 1998, ang mga lederes sa katilingban sa San Roque nangita ug paagi aron ma “reach out” ang   daghang lumulopyo nga dili makatambong sa kapilya. Naghimo ug Rito aron gamiton sa “reach out” sa mga panimalay.

Kini adunay 5 ka bahin: 1) Prayer & worship 2) rosary 3) katilingbanong pasalamat/pangamuyo 4) Bible Sharing  5) fellowship. Pagkahuman, i-pilgrimage balhin sa laing panimalay. Kini gipaaprobahan sa Kura Paroko sa San Pablo Parish. Gihimo kini makatulo (3x) sa usa ka semana sa panahon sa kagabhion sulod sa 2 ka tuig ug tunga – 1999-2002.

90% nga mga panimalay nga Katoliko ang naabot sa maong “reach out”. Kini hinungdan  nga nanganak na usab ang San Roque  sa ika- 5 nga GKK nga mao ang Queen of Peace GKK, nga nanganak na usab sa Immaculate Concepcion GKK sa Concepcion Compound. Wala madugay namugna na usab ang GKK sa Blessed Sacrament, sakop sa NHA P-4 (Sectoral). Sa pagkakaron adunay  8 ka GKK ang NHA apil na ang Inahan sa Kanunayng Panabang (IKP) GKK nga anaa sa NHA Seaside.

Nahunong ang pag reach out tungod  sa mga meeting sa katukuran sa bag-ong  parokya, ang OUR LADY OF LOURDES PARISH. Kini konkreto nga kamatuoran nga ang matuod nga simbahan molambo ug mulahutay gayod kay si Kristo maga-uban man kanunay hangtod sa Katapusan sa kapanahunan, Mt. 28:19.

Ang inahang GKK, ang San Roque-Kadayawan padayon nagtubo uban sa mga minugna nga mga kapunungan sa pag-tinabangay nga mao ang PASAKA  ug KAFMA. Ang PASAKA mao ang nagdasig sa pag-alagaray sa katilingban hilabina sa kapistahan. Ang KAFMA  usa ka Mortuary Assistance.

                Kaniadtong Agosto 16, 2014, madasigon ug malipayong nagsaulog ang San Roque GKK sa ika-21 katuig nga kapistahan. Gihimo ang Santos nga Misa niadtong Agosto 15 sa gabii. Human sa Misa, adunay  fellowship sa tanang nanambong agi ug pasalamat. Mapasalamaton ang mga lederes sa  GKK pinaagi sa PSK nga si Alice L. Acebedo ngadto sa nag-saulog sa Misa, si Fr. Dexter Veloso, Parish Priest sa OLL Parish, sa tanang nanambong, ug sa tanang nagsuporta sa GKK.