Dili Sayon Ang Pagsunod Kang Kristo

Ika-22 nga Domingo sa Ordinaryong Panahon
Jer. 20:7-9/ Ps. 63:2-6,8-9/ Rom. 12:1-2/ Mt. 16:21-27

Duna bay mga advertisement sa radyo, TV ug newspaper mahitunogd sa pagpas-an sa krus? Wala gayod! Ang mga advertisement mahitungod lamang sa pagpasayon, pagpagaan, pagpadali ug pagpahayahay.

Ang tinuod nga relihiyon wala diha sa pasalig sa sayon nga kinabuhi kondili diha lamang sa pag-antus tungod sa pagtamud sa katarung. Walay bililhong butang nga maangkon pinaagi sa kasayon. Moagi gayod sa daghang hagit ug kalisud ang tawong mosaksi sa pagkamatinud-anon, pagpaubos, hustisya, pagkamanggihatagon ug kaputli. Ang tawo nga naningkamut pagpuyo niining maong mga mithi andam gayod nga biay-biayon ug yam-iran ug dili motalaw sa pagbarug sa gituohan.

Bisag walay nahimong sayop si Kristo, Siya midawat sa kasakit nga moabot Kaniya. Nalantaw Niya ang sangputanan sa pagsanong sa misyon nga gisangon Kaniya sa Amahan. Apan wala kini makapabugnaw Kaniya ug wala Siya motalikod sa maong kaakuhan kay alang Kaniya, niining paagiha Iyang mabalik ang tawo ngadto sa Dios.

Ang tinuod nga pagbalik ngadto sa Dios wala naghimo kanatong dili na madutlan sa mga kasakit ug kalisod. Ang pagbag-o sa kaugalingon ug pagbiya sa sala wala nagpasabot nga gawasnon na kita sa kapait ug paglutos. Gani dunay uban moingon, “kung kanus-a pa ko mibiya sa akong bisyo, diha pa ko gitagaan ug anak nga masakiton kaayo nga maoy nakapabug-at sa among pagpuyo.” Ang uban usab moingon, “kung kanus-a pa ko nag-alagad, diha pa hinuon gikuha sa Dios ang kinabuhi sa akong kapikas.” Kini pipila sa krus nga mahimong atong pas-anon aron ang tinuod nga himaya ug kadaugan atong maangkon.

Busa, dili unta kita magpalimbong sa pagsunod sa kasayon, kondili sa Dios nga nag-antus alang kanato. Ihalad unta nato ang atong lawas isip buhing sakripisyo, balaan ug makapahimuot Kaniya bisan dili sayon ang pagsunod kang Kristo.