Bag-ong pari, diakono alang sa Tagum

TAGUM CITY—“This is the day that the Lord has made. Let us rejoice and be glad.”

Kini ang giingon sa bag-ong gi-ordinahan nga pari sa Dyosesis sa Tagum human niya madawat ang sakramento sa ordinasyon pinaagi sa pagpandong sa kamot ni Bishop Wilfredo Manlapaz sa iyang ulo sa rito nga gihimo niadtong Agosto 26, Christ the King Cathedral niining syudad.

Sa iyang pulong pasalamat, giingon ni Fr. Roselo Melloria nga taga-Holy Family Parish sa Laak, Compostela Valley nga dili kabayran ang kalipay nga ilang gibati niadtong hapona diin nadawat nila ang sakramento sa pagka-pari ug diakono.

Nahimo usab siyang emosyonal panahon sa pagsulti niya mahitungod sa iyang amahan nga mipanaw na ug wala na makakita sa pagkatuman sa iyang pangandoy nga mahimong pari.

Gi-ordinahan usab ni Bishop Manlapaz sa pagka-diakono sila si Rev. Judel Salarda nga taga Nuestra Señora dela Asuncion Parish sa Asuncion, Davao del Norte ug si Rev. Jhoniel Poliquit nga taga San Vicente Ferrer Parish sa Maragusan.

Sa iyang bahin, giingnan ni Bishop Manlapaz ang mga bag-ong pari ug diakono nga magpabiling putli ug dili minyo.

Ingon usab niya nga isangyaw nila ang Pulong ug ila kining apilan ug lihok.

Apil usab sa maong seremonya ang mga kaparian sa Tagum ug Mati, ug si Msgr. Abel Apigo nga rector sa St. Francis Xavier Regional Major Seminary diin nahuman si Rev. Salarda ug Fr. Melloria sa ilang pormasyon. (@johnfrancesf)