Ang Sakramento diha sa Simbahan

P: Unsa man ang kadugtongan tali sa mga sakramento ug sa Simbahan?

T: Gitugyan ni Cristo ang mga sakramento ngadto sa iyang Simbahan. Kini sila mga sakramento sa Simbahan sa duruha ka pagsabot: sila “gikan kaniya” sanglit mga buhat man sila sa Simbahan nga mao ang sakramento sa buhat ni Cristo ug sila “alang kaniya” sanglit sila nagapalambo man sa Simbahan.

P: Unsa man ang sakramentohanong patik?

T: Usa kini ka espirituhanon nga “selyo” nga gipadangat sa mga sakramento sa Bunyag, Kompirma, ug Balaan nga mga Orden. Unsa kini ka saad ug garantiya sa diosnong panalipod. Sa gahom niining maong selyo ang Kristyanong gihulma ngadto kang Cristo, nagasalmot sa nagkadaiyang mga pamaagi diha sa iyang pagkapari ug nagadawat sa iyang papel diha sa Simbahan sumala sa lainlain nga mga kahimitang ug taas. Mao nga siya gilain alang sa diosnong pagsimba ug pag-alagad sa Simbahan. Tungod kay kining maong patik dili man mapapas, ang mga sakramento nga maoy nagkulit niini sa kalag makausa lamang madawat sa kinabuhi.

P: Unsa man ang kalambigitan sa mga sakramento ug sa pagtoo?

T: Ang mga sakramento wala lamang manginahanglan og pagtoo apan sila uban sa mga pulong ug mga elemento sa rito, nagamatuto, nagapalig-on, ug nagapadayag niini. Pinaagi sa pagsaulog sa mga sakramento ang Simbahan nagapadayag sa pagtoo nga nagagikan sa mga apostoles. Kini nagapatin-aw sa gigikanan sa karaan nga panultihon, “lex orandi, lex credendi,” sa ato pa, ang Simbahan nagatoo sumala sa iyang gi-ampo. (Cf. Kompendiyo sa Katesismo sa Simbahang Katoliko, 226-228)