Aktibong partisipasyon sa GKK,aduna pa ba?

Usa sa mga instrumento aron kita mapaduol sa Ginoo ang pag salmot sa mga aktibidades sa GKK kon Gagmayng Kristohanong Katilingban. Ang GKK usa ka parte sa simbahan nga adunay tumong nga magpadayag sa pulong sa Ginoo. Isip gamay nga yunit sa simabahan, aduna kini dakong naambag sa katawhan ilabina sa pagpalig-on sa pagtoo sa Ginoo.

Apan aduna pa bay pagpakabana ang  mga miyembrong nakalambigit niini?

Usa ang kapilya sa Sr. San Antonio sa Agdao nga mingreklamo bahin sa kagamay sa mga manambong sa maong pagtapok. Matod  pa ni Sirinea Pelenio usa ka PSA kon Pangulo sa Alagad nga kulang  gayod sa pagpakabana ang katawhan karon ilabina ang mga kabatan-onan.

Apan naglibog si Pelenio nganong gamay lang ang mutambong sa mga kasaulogan buot daghan ang nagasimba sa simbahan.

“Adunay dose hangtod katorse lang ang manambongay sa among kapilya” matud ni Pelenio. “Kulang usab sa mga aktibidades ang kapilya nga mupukaw sa interes sa mga tao aron mutambong sa kapilya.”

Dili malikayan nga karong panahona pipila nalang ang mutambong sa mga aktibidades sa GKK tungod sa kulang sa atensyon ang mga tao.

Nagtuo si Saturnina Repollo, PSP (Pangulo sa Pagpanudlo) sa kapilya sa Sto. Nino sa Talomo  nga usa sa mga hinungdan sa kagamay sa mga mutambong sa kasaulogan mao ang kulang nga pag-awhag sa mga ginikanan sa ilahang mga anak nga mupartisipar sa mga aktibidades sa kapilya.

“Saunang panahon, daghan pa ang musalmot sa GKK kay aktibo man ang mga katiguwangan sa kapilya, sila ang mu-awhag sa mga batan-on nga mupartisipar gyud.” matud ni Repollo, “Karon ang ubang mga tiguwang nga aktibo sa una, wala na. Dili usab nimo maasahan ang mga batan-on karon. Gani ang mga edaran, talagsa ra pud kay ang uban ma-busy na sa mga laing butang.”

Apan dili lang ang mga miyembro ang adunay kakulangan sa ilahang responsibilidad sa kapilya. Dungag ni Repollo, “Ang mga lider, mutambong man, pero di gyud maingon nga pernamente. Bisan ako, usahay maka-absent pud.”

Sa pikas bahin, bisan sa kagamay sa mga manambong aduna pa gihapon aktibo sa GKK isip pagpakita sa ilang pagtoo sa Ginoo. Matud pa kay Esmersita Aquino, usa ka PSA, labaw nga aktibo ang kabatan-onan sa ilahang kapilya kompara sa katiguwangan. Matud niya, kini tungod sa mga aktibidades nga gi-mugna sa ilahang GKK sama sa Bayanihan ug Church Choir. Aduna usab Training Center ang Parokya sa Sto. Rosario diin mahatagan ug oportunidad ang mga batan-on nga mu-iskwela sa TESDA.

Kung pangutan-on ang PSA sa Talomo nga si Saturnina Repollo kung unsa ang mamahimo aron mapalambo usab ang kapilya, tubag niya, “Kinahanglan lang gyud ta ug partisipasyon, impormasyon ug komunikasyon. Kung anaa lang ning mga butanga, mulambo pa gyud ug maayong atong GKK.”

Isip usa ka Kristiyano aduna gihapon tay responsibilidad sa matag-usa, ilabi na sa atong komunidad. Ang GKK usa sa mga butang nga ginapaningkamotan sa atong simbahan aron kita mamahimong maayong ehemplo sa katawhan.

Daryl Ferchie Castillo, Joanna Paola Garado & Norlyn Morga