Sa Katilingbang Kristohanon, Katagbawan Maangkon

Ikanapulo’g walo nga Domingo sa Ordinaryong Panahon
Is. 55:1-3/ Ps. 145:8-9, 15-18/ Rom. 8:35, 37-39/ Mt. 14:13-21

Dyutay ra ang moingon nanobra ang ilang kapaninguhaan ug natagbaw sila sa ilang naangkon. Daghan ang moingon naglisod sila ug nagpait.

Human gipatay si Juan, ang mga tawo nabugnaw kang Herodes. Miapas sila kang Hesus aron mangita og katagbawan. Si Hesus naluoy kanila. Sila Iyang giayo ug gipakaon.  Si Hesus ilang gidangpan.

Usahay adunay miyembro sa atong panimalay nga nangita og kadangpan taliwala sa problema nga ilang gipas-an. Andam ba kita nga modawat kung sila nakabuhat og dakung sayop? Kung dili nila mabati nga sila kanato makadangop, kang kinsa pa man diay sila magpakitabang?

“Kamo mismo ang maghatag kanila’g pagkaon.” Mao kini ang gisulti ni Hesus sa Iyang mga tinun-an sa dihang nagsugyot sila nga papaulion na ang mga tawo kay hapit na mosalop ang adlaw ug awaaw kadtong dapita. Si Hesus mipugong kanila ug mihagit nga sila mismo maoy magpakaon kanila.

Ang kalamboan nag-agad sa atong pagtambayayong ug kaakuhan. Usa ka kanhing Presidente sa Estados Unidos miingon, “ayaw pangutana unsay mahimo sa imung nasud alang kanimo, kondili pangutana kung unsay imong mahimo alang sa imong nasud.” Sa samang paagi, dili unta kita magpaabot unsay mahimo sa uban alang kanato, kondili molihok kita ug motampo alang sa kaayohan sa atong isigkatawo.

Gikan sa lima ka pan ug duha ka isda, nangaon ang tanan ug nangabusog. Kini nahitabo human si Kristo nagpasalamat, mipikas ug mihatag niini ngadto sa Iyang mga tinun-an, nga mao usab ang miapod-apod niini ngadto sa mga tawo.

Iphon unta nato ang atong mga panalangin ug grasya. Bisan sa ginagmay natong makaya, kung andam kitang motampo, makatabang kini sa katagbawan sa isigkatawo.

Taliwala sa kapait ug kalisud, walay makabulang kanato sa gugma ni Kristo. Busa modangop kita Kaniya kay sa kauhaw ug kagutom ang Ginoo tinuod gayod kanato nagpakaon. Sa Iyang katilingbang Kristohanon, ang hingpit nga katagbawan maangkon.