Pulong sa Kinabuhi

Hunyo 2014

“Kon duha kaninyo dinhi sa yuta magkauyon pagpangayo bisan unsang butanga, kini ihatag kaninyo sa akong Amahan nga atua sa Langit. Kay kon may duha o tulo nga magkatigom sa akong Ngalan, atua ako uban kanila.” (Mateo 18:19-20)

Sa akong paminaw, usa ni sa mga pulong ni Jesus nga makapuno sa kasingkasing ug kalipay. Pagkadaghan sa atong panginahanglan ning kinabuhia, mga pangandoy–maayo ug matarong–apan wala ta masayod unsaon pagtagbaw. Kombinsido ka nga tabang lamang gikan sa kahitas-an, usa ka grasya ang makatuman sa imong gipangayo gikan sa kinahiladman sa kasingkasing. Dinhi madunggan nimo gikan sa babâ ni Jesus mismo sa hilabihang kaklaro, sa nagagilak nga katin-aw,  puno sa paglaum ug panaad, ang mga pulong:

“Kon duha kaninyo dinhi sa yuta magkauyon pagpangayo bisan unsang butanga, kini ihatag kaninyo sa akong Amahan nga atua sa Langit. Kay kon may duha o tulo nga magkatigom sa akong Ngalan, atua ako uban kanila.”

Basin nabasa na nimo sa Ebanghelyo nga sa makadaghan si Jesus nagsugyot sa pag-ampo ug nagtudlo’g unsay buhaton aron maangkon ang imong gipangayo. Talagsaon ang atong gihisgotan;  kay aron  ang pangamuyo tubagon sa Langit, gikinahanglag bisag duha; ug sa ato pa, ang katilingban mao ang mohangyo o mohalad niini. Nag-ingon Siya: «Kon duha kaninyo». Duha. Ang kinagamyang  numero aron maporma ang katilingban. Si Jesus dili manumbaling kon pila, kondili ang nagka-uyon nga katilingban. Bisan sa mga Judio, –basin nasayod ka na– nahibalo sila nga ang Ginoo mahimuot sa pag-ampo sa mga nagkatigom;  kon may magkatigom nga mag-ampo; apan may bag-ong gidugang si Jesus: «kon duha kaninyo… magkauyon». Buot Niya nga daghan ang tawo, apan nagkahiusa.  Gipalabi Niya ang pagka-uyonay: buot Niya ang usa ra gayod ka tingog!

Kinahanglan nga magsabot una sila kon unsa’y pangayoon; apan kining ilang hangyo kinahanglang isandig sa kasingkasing nga nagsinabtanay. Klaro ang gipasabot ni Jesus, nga ang kondisyon aron maangkon ang gipangayo mao nga ana-a unta’y paghigugmaay sa usag-usa.

“Kon duha kaninyo dinhi sa yuta magkauyon pagpangayo bisan unsang butanga, kini ihatag kaninyo sa akong Amahan nga atua sa Langit. Kay kon may duha o tulo nga magkatigom sa akong Ngalan, atua ako uban kanila.”

Ngano man nga ang mga pag-ampo nga nagagikan sa panaghiusa mas paminawon man sa Amahan? Tingali tungod kay kining tipong pag-ampo miagi na sa paghinlo. Kasagaran man gud sa mga pag-ampo mahulog sa mga pangaliya ug hangyo para lang sa kaugalingong kaayohan; mora’g mga nagpakilimos atubangan sa usa ka hari, dili  anak atubangan sa Amahan.

Apan kadtong mga gipangayo uban sa kadaghanan seguradong menos ang mancha sa kaugalingong mga tinguha. Kon may kalabotan ang uban, mas makaamgo ta sa ilang mga panginahanglan ug mas  masinati ang pag-inambitay. Ug dugang pa: kay mas sayon pa nga duha o tulo ka tawo magkasabot ug maayo unsa gayod ang angay pangayoon ngadto sa Amahan. Kon buot natong madunggan ang mga pag-ampo mas maayo gayod nga mounong sa gisulti ni Jesus, ug mao kini:

“Kon duha kaninyo dinhi sa yuta magkauyon pagpangayo bisan unsang butanga, kini ihatag kaninyo sa akong Amahan nga atua sa Langit. Kay kon may duha o tulo nga magkatigom sa akong Ngalan, atua ako uban kanila.”

Si Jesus mismo ang nagsulti unsa ang sekreto sa mabungahong  pag-ampo. Anaa tanan nianang “magkatigom sa akong Ngalan.” Niining maong pagkatigom, giubanan ta sa iyang Presensya ug mas dalî pa madawat ang tanang butang nga atong pangayoon uban Kaniya. Sa tinuoray, si Jesus, nga anaa diin ang paghigugmaay maoy naghiusa sa mga kasingkasing, Siya mismo mao ang maghangyo sa mga grasya uban kanato ngadto sa Amahan. Dili ba maminaw kang Jesus ang Amahan? Ang Amahan ug si Cristo usa ra.  Dili ba masanagon ning tanan? Wa  ba ni makahatag kanimo’g kasiguroan ug pagsalig?

“Kon duha kaninyo dinhi sa yuta magkauyon pagpangayo bisan unsang butanga, kini ihatag kaninyo sa akong Amahan nga atua sa Langit. Kay kon may duha o tulo nga magkatigom sa akong Ngalan, atua ako uban kanila.”

Nan, karon seguro, naghinamhinam ka nang masayod kon unsa’y gusto ni Jesus nga imong pangayoon. Siya mismo klaro kaayong miingon: “bisan unsang butanga.” Wala gayod diay utlanan. Busa, iapil sab kining pangaliya sa paghan-ay sa imong kinabuhi. Tingali ang imong pamilya, imong kaugalingon, imong mga higala, ang kapunongan diin ka nahisakop, ang imong nasod, ang kalibotan nga nahikawan sa daghang mga tabang kay wala nimo pangayoa.  Pakigsabot sa mga tawong haduol sa imong kasingkasing, kadtong mga nakig-uyon kanimo o nakig-ambit sa imong pangandoy, ug human maandam ang isigkaugalingon sa paghigugmaay subay sa sugo sa Ebanghelyo -aron mahiusa kamo ug maangkon ang presensya ni Jesus sa inyong taliwala- pangayo kamo. Pangayo kutob sa inyong mahangyo: pangayo samtang anaa nagkatigom mo sa liturhiya; pangayo sulod sa simbahan; pangayo bisan asa; pangayo-a una sa dili  pa maghukom; pangayo bisa`g unsa..

Apan labaw sa tanan, ayaw itugot nga si Jesus masakitan tungod sa imong walay pagpakabana, human Siya  nakahatag kanimo sa makadaghang higayon.

Ang mga tawo mas mopahiyom na, mobalik na ang paglaum sa mga masakiton; ang mga bata magtubo likay sa kadautan, ang pamilya mas han-ay ug masinaboton; ang mga dagkong suliran matagaan ug panahon sa pagsulbad diha sa sulod sa panimalay… Ug maangkon ninyo ang Paraiso, tungod kay ang pag-ampo bahin sa mga panginahanglan  sa mga buhi ug sa mga patay usa pod sa mga buhat sa kalooy  diin pangutan-on ta Niya sa kataposang paghusga.

Chiara Lubich