“Kinahanglan muhimo kita og marka sa atong katilingban”

Gihagit sa Director sa Archdiocesan Social Action Center (ASAC) ang mga Pangulo sa Alagad nga muhimo og marka diha sa ilang tagsa-tagsang Gagmay’ng Kristohanong Katilingban (GKK).

Sa gipahigayong monthly meeting sa mga Parish Social Action Ministry (PSAM) diin kabahin ang mga PSA, giingon ni Fr. Leonardo Dublan, Jr., ASAC Director nga dili sakto nga kutob lang sa pagpanglimpyo og kapilya ang buluhaton sa mga PSA kon dili adunay mas daghang mga butang nga angay nga ilang himoon.

Gipasabot ni Fr. Dublan nga ang PSA kinahanglan magpadagan og mga programa nga subay sa ilang katungdanan mahitungod sa pagserbisyo sa katawhan ug dili igo nga manglimpyo lang sila og mga kapilya.

“Kasagaran lutaw-lutaw lang ang atong mga programa ilabi na sa socio-ecological aspect. That is the hard reality,” sumala ni Fr. Dublan.

“Kita sa Social Action, we think big pero pag-apply ron, mudagan apan dili ma-sustenar,” dugang niya.

Gi-awhag usab niya ang mga PSA nga mupadagan og mga programa bahala’g isa o duha ka programa nga ginagmay basta maka-dagan kini ug makatabang sa mga miyembro sa GKK.