Ika-52 nga kapistahan sa Bunawan Parish gisaulog

Gisaulog sa mga lomolupyo sa Bunawan ang kapistahan sa ilang patron nga si Santiago Apostol, Hulyo 25.

Pinaagi sa Santos nga Misa nga gipangulohan ni Archbishop Romulo G. Valles, nahimong mas balaanon ug solemni ang kasaulogan sa ika-52 nga kapistahan sa St. James the Apostle Parish.

Gihimo usab sa adlaw sa kapistahan ang “Pagbuak sa Alkansya sa Bokasyon” human sa ikaduha’ng Santos nga Misa. Kahinumduman nga kini gisugdan panahon sa kanhing kura paroko sa Bunawan nga si Fr. Jovil Bongay isip pagsuporta sa mga seminarista nga gikan sa parokya sa Bunawan. Kini gipadayon aron mapalambo ang bokasyon sa pagka-pari sa maong parokya.

Isip pagpangandam sa kapistahan, gipahigayon sa mga lideres ug mga parokyano ang novena Masses ug parish cleaning nga gihimo sa mga ministriya ug mga grupo nga nahisakop sa parokya.

Mapasalamaton ang kura paroko nga si Fr. Rommel Banilad kauban ang mga miyembro sa Parish Coordinating Council, Parish Staff ug mga parokyano sa kalampusan sa kasaulogan sa ika-52 nga kapistahan sa St. James the Apostle Parish, Bunawan, Davao City. (@johnfrancesf)