“Gitawag kita dili aron magmalampuson kondili aron magmatinud-anon”

Ikanapulo’g lima nga Domingo sa Ordinaryong Panahon
Is. 55:10-11/ Ps. 65:10-14/ Rom. 8:18-23/ Mt. 13:1-23

“Dili tanan mosimba buotan, dili tanan buotan mosimba.” Mao kini ang mga pulong sa usa ka kanta.

Mahimo usab kita nga moingon dili tanang Kristohanon malampuson ug dili tanang malampuson Kristohanon.

Kining maong kamatuoran sa kinabuhi maoy gihulagway sa sambingay sa Ebanghelyo karon. Daghang higayon nga si Kristo mismo napakyas sa pagkabig sa katawhan. Ang uban mibiya Kaniya, ang uban mibiay-biay kaniya, ug ang uban mipatay kaniya. Apan si Kristo nagpadayong matinud-anon sa iyang misyon. Alang kang Kristo walay makapugong sa Iyang plano taliwala sa mga pagsupak sa kadaghanan ug pagsulay sa kalibutan.

Ang kapakyasan dili babag kaniya aron magpabiling matinud-anon. Siya kanunay nga misabod sa binhi bisan sa mga tawong sama sa dalan diin nahulog ang ubang binhi, nagmagahi sa pagtuo sa iyang mensahe tungod sa ilang kaugalingong panglantaw. Si Kristo nagdawat sa mga tawong sama sa sampinitan diin nahulog ang mga binhi, nalumos dayon sa mga kahilayan ug kalibutanon nga kalipay.

Si Kristo nagpadayon sa pagsabot sa mga tawong sama sa binhi nga nangahulog sa kabatoan ug sanglit walay giladmon, sila motalikod dayon sa Dios sa panahon sa mga kalisod ug pagsulay. Si Kristo malaumon kanunay nga dunay mga tawo nga sama sa tambok nga yuta mobunga og maayong buhat tungod sa ilang kalig-on sa pagtuo ug pagsabot sa ilang gituohan nga gipakita sa ilang matag-adlaw nga pagpuyo.

Sa samang pagkaagi, ang atong pahiyom ug pagkamaabi-abihon makaaghat og kadasig sa uban. Ang atong pagpasaylo ug pagpailob makapaamgo sa nakasala sa ulahing mga adalw. Ang atong kakugi ug pagkamakanunayon bisan sa mga pagtamay mahimong kapanaminan ugma damlag.

Ang matuod nga Kristiyano malaumon ug nag-isip sa mga pag-antus niining panahona nga dili gayod ikatandi sa himaya nga ipadayag unya kanato. Bisan siya nag-agulo, siya nasayod nga ang kaluwasan moabot, kay siya misalig sa pulong sa Dios nga dili mobalik nga kawang lamang kondili tumanon hinuon ang tuyo niini ug molampos gayod kini.