Ang Pagkalawat

Gdpm Brothers, ask lang ko sa time na magkalawat ta ang pari mangalawat ug mag-inom sa bino sama sa unod ug dugo ni Kristo, pero ngano sa manimbahay kalawat man lang dili man sila moinom ug bino? Maghulat ko sa inyong tubag. Noel of Panacan 0923-681****

“Salamat igsoong Noel sa imong pangutana, panahon sa Santos nga Misa importante gayud nga anaa ang duha ka matang, ang pan ug bino ilabi na sa panahon sa konsagrasyon. Ang pari maoy tinugyanan sa gahum nga makapabalhin sa pan ug bino ngadto sa lawas ug dugo ni Kristo. Gitawag kini og transubstantiation o ang pagbalhin sa tinuod nga lawas ug dugo ni Kristo apan nagpabilin ang dagway niini sa pan ug bino (cf. Mateo 26:26-28, 1 Cor. 11:23-27 ug Juan 6:51, 56-58).

Busa kanang pan nga atong ginakalawat sa matag-misa, buhing lawas ni Kristo. Ug tungod kay buhi man, anaa pud ang iyang dugo. Sa matag-kaon nato niana ang tibook Kristo ang atong gidawat.

Ikaduha, nganong pan lamang ang atong dawaton? Tungod sa kadaghan sa manimbahay halos puno ang simbahan ug moabot sa ginatos ang ihap sa manimba sa matag-oras ug tungod sa may pagka-mahal ang bino kay gama kana sa pure gayud nga duga sa ubas o grapes, busa maglisod ang simbahan nga apil kita nga manimbahay paimnon pa niini. Kini gitawag og ekonomikanhong rason nga angay usab natong sabton.

Busa ang importante sa matag kalawat nato anaa ang katakus sa pagdawat sa lawas ni Kristo uban sa bug-os gayud nga pagtoo, kay kana buhing lawas man. Busa kon buhi kini, gilangkob na niana ang buhing dugo usab ni Kristo.”