Ang Katapusang Hukom

P: Unsa man ang kataposan nga hukom?

T: Ang kataposan o malukpanon nga hukom mao ang pagpakanaog og hukom sa kalipayan o tunhay nga kalaglagan, nga ipahamtang sa Ginoong Jesus sa mga “matarong ug tampalasan” (Buhat 24:15) sa iyang pagbalik isip Maghuhukom sa mga buhi ug sa mga minatay. Human sa kataposan nga paghukom, ang nabanhawng lawas makatagamtam sa bugti nga nadawat na sa kalag sa tinagsa-tagsa nga paghukom.

P: Kanus-a man mahitabo kining maong paghukom?

T: Kining maong paghukom moabot sa kataposan sa kalibotan ug ang Dios lamang ang nasayod sa adlaw Unsa manug sa takna.

P: Unsa man ang kalaoman sa bag-ong kalangitan ug bag-ong yuta?

T: Human sa kataposang hukom, ang uniberso mismo, nga nalingkawas na gikan sa kaulipnan sa pagkadunot, maka-ambit diha sa himaya ni Cristo uban sa sinugdanan sa “bag-ong kalangitan” ug “bag-ong yuta” (2 Pedro 3:13.) Nan, ang kahingpitan sa Gingharian sa Dios moabot, nga nagpasabot, sa hingpit nga katumanan sa maluwasnong plano sa Dios sa “paghiusa sa tanang binuhat diha sa langit ug sa yuta ubos sa pagpangulo ni Cristo” (Efeso 1:10). Ang Dios mahimo nga maoy maghari sa tanan hingpit gayod” (1 Corinto 15:28) sa tunhayng kinabuhi. (Kompendiyo sa Katesismo sa Simbahang Katoliko, 214-216)