Ang kalipay nga hilabihan, kang Kristo lamang makaplagan!

Ikanapulo’g Pito Nga Domingo
sa Ordinaryong Panahon
1 Mga Hari 3: 5,7-12 / Ps. 119:57,72, 76-77,127-130 /
Rom. 8:28-30/ Mt. 13:44-52

“Unsa ang inyong gusto sa kinabuhi?” Mao kini ang pangutana sa usa ka maestro ngadto sa iyang mga estudyante.  Nagkadaiya ang mga tubag. Kadaghanan  gusto mag-doctor, mag-nurse ug mag-teacher. Ang uban gusto mag-engineer.Adunay pipila nga gusto mag-abogado. Apan adunay usa ka batang naghilom-hilom lang. Natingala ang maestro mao nga iyang gipangutana, “Ikaw, unsa man imong gusto sa kinabuhi?” Ang estudyante mitubag, “Gusto ko malipay.”Na-shock ang maestro ug mipadayon sa pagpangutana, nganong dili man ka gusto mag-doctor o mag-teacher sama sa imong mga clasmates? Ang estudyante mitubag, “Unsaon man naku na nga profession kung dili ko magmalipayon?”

Walay tawo niining kalibutan  ang wala nagtingu hanga malipay. Siguro kitang tanan gusto malipay. Mao kini ang hinungdan kung nganong si Solomon diha sa atong unang pagbasa nangayo sa Ginoo nga hatagan siya’g kaalam sa paghukom sa katawhan. Ug  sa atong Salmo Responsoryo kita miingon, “Ginoo, gihigugma ko ang imong mga sugo.”Mao usab kini ang punto ni San Pablo sa atong ikaduhang pagbasa diha sa iyang sulat ngadto sa mga taga-Romano.

Mao nga sa atong ebanghelyo atong masabtan kung ngano ang mga tawo nga nakakaplag sa bahandi nga maoy naghatag og kalipay kanila, andam sa pagsakripisyo ang tanan aron lang maangkon ang maong bahandi tungod kay kini ilang giisip nga maoy makahatag kalipay.

Kung  ikaw katong maong tawo, andam ba nimo i-sakripisyo ang tanan aron lang maangkon nimo ang maong bahandi? Isip mga kristiyano, si Kristo ang atong tinuod nga bahandi niining kalibutana. Siya ang tuburan sa kalipay ug ang makahatag sa kalipay nga atong gipangita. Karon ang pangutana, andam ka ba sa pagsakripisyo alang kang Kristo?

Sama sa maestrao nga nangutana sa iyang nga estudyante, ako usab mangutana kaninyo, “Unsa man inyong  gusto sa kinabuhi?”Gusto ba usab nimo magmalipayon o magpakabuhong sa butang kalibutanon? Atong hinumduman mga kaigsoonan nga ang kalipay nga hilabihan, kang Kristo lamang makaplagan!