Ang Bunyag ug Paghalad sa Bata!

Maayong Hapon, Mangutana ko, Asa nato Mabasa sa Bible nga Bunyagan ang bata? Sa uban pundok man gud dako na bunyagan, ang bata gina-dedicate nila. Magpaabot ko sa inyong tubag. I’m Bernie Pandeling of Sto. Tomas, Davao del Norte, Thanks 09069020…..

Nganong bunyagan man ang gagmay’ng bata? Tubag: Diha sa balaang kasulatan ang atong Ginoong Hesukristo nagapasidaan kanatong tanan nga “ang motuo ug magpabunyag maluwas” (Marcos 16:16). Ug diha usab sa Juan 3:5 siya miingon “Sultihan ko ikaw; walay makasulod sa gingharian sa Dios, gawas kon matawo siya pinaagi sa tubig ug sa espiritu”.  Ug sa wala pa siya mosaka sa Langit siya naghatag ug katapusang pahimangno ug sugo sa iyang mga tinun-an  siya miingon “Panlakaw kamo sa tibuok kalibutan ug himoa sila nga akong mga tinun-an ug BUNYAGI SILA SA NGALAN SA AMAHAN, SA ANAK UG SA ESPIRITU SANTO” (Mateo 28:19-20).

Busa ang bunyag gikinahanglan gayud mintras bata pa kay ang  bunyag mao man ang pagpapas sa salang panulondon o original sin, usa ka sala nga napanunod nato sa atong unang ginikanan nga si Adan ug Eva (cf. Roma 5:12). Aron makuha kini kinahanglan nga kita pagabunyagan subay sa giingon sa atong Ginoong Hesukristo (cf. Juan 3:3-5).

Ang mga bata  natural nga walay salang aktwal, usa ka personal nga pagbuhat og dautan nga subay sa iyang konsensya ug kabubot-on, wala sila niana, kondili ang ila mao kadtong sala nga napanunod nato sa atong unang ginikanan, ang salang panulondon. Gi-pruybahan diha sa bibliya nga sa bata pa kita aduna na kitay kalapasan, “Dautan ako sukad ako gipahimugso, ug makasasala sukad ako gipanamkon” Salmo 51:5. Ug  bisan si Propeta Isaias siya nag-ingon nga “sukad sa atong pagkahimugso masupilon kamo”  (Isaias 48:8). Mao nga kinahanglan gayud  kitang paga-bunyagan aron madawat nato ang grasyang makasantos ug mahimo kitang miyembro sa iyang lawas nga mao ang Simbahan. Ilhon na kitang Kristiyanos ug sinagup nga anak sa Dios ug maka panunod sa gingharian sa langit.