Sikreto sa GKK Gibutyag

Sa usa ka talagsaong higayon napahitabo ang Archdiocesan GKK Gathering, Mayo 26-28, didto sa St. Francis Xavier Regional Major Seminary, Catalunan Grande, Davao City.

Gitambongan sa kapin 200 ka mga laykong lideres ug kaparian sa 37 ka mga parokya sa Arkidyosis sa Dabaw, malampuson nga napahigayon ang panagtapok ug paghisgot sa kasamtangang kahimtang sa mga Gagmay’ng Kristohanong Katilingban (GKK) aron mapalambo ang pagsabot ug pagpadagan niini.

Ang maong panagtapok bunga sa GKK data validation nga gihimo kaniadtong 2009 sa pagsaulog sa Arkidyosis sa 60th anniversary niini. Gihimo usab ang vicariate levelling off sa mga layko ug mga kaparian sukad niadtong Marso hangtud Mayo niining tuiga.

GKK Norms 

Ang kasamtangang GKK Norms and Policies maoy nahimong sukaranan sa mga diskusyon.

Sumala sa Arsobispo sa Dabaw, Abp. Romulo G. Valles, gilantaw nga makahimo og bag-ong gamiton nga GKK Norms and Policies nga maoy sundon sa Arkidyosis sa Dabaw.

Kini tungod sa mga bag-ong realidad nga mitumaw karon, sama sa climate change, pagdaghan sa mga condominiums ug uban pa.

Gipaklaro ug gipasabot nga ang mga miyembro sa GKK mao ang mga binunyagan nga Katoliko nga nagpabilin sa ilang pagtoo. Ang pagkamiyembro wala nag-agad sa monthly dues o pagka-aktibo kondili sa pagka-binunyagan.

Gipaklaro usab nga kinahanglan masayod kita pila gayod ka pamilya o bubong ang miyembro sa matag GKK. Kini subay sa atong pastoral nga panglantaw nga maalagaran ang matag pamilya.

Ipadayon usab ang pagduso sa mga sugyot o proposals mahitungod sa isyu sa mga lideres, pagtukod sa GKK, mga selebrasyon, mapadayunong pormasyon ug uban pa.

Human niining norms sa GKK, gahinan na usab og panahon ang pagtuki ug paghisgot sa mga sakramento nga may kalabutan diha sa kinabuhi sa GKK.

Yukaristikanhon

Sa iyang wali sa misa nga gihimo sa pag-abli sa maong tigum, gihatagan ni Abp. Valles og gibug-aton ang pagka-yukaristikanhon sa GKK. Alang kaniya, ang mga unang Kristiyano nasentro diha sa Santo nga Misa. Sila gibuhi sa pagsaulog niining balaang sakramento.

“Ang Ginoo nalipay sa iyang lungsod.” Mao kini ang salmo responsoryo, matud pa ni Abp. Valles, nga nagpahinumdom kanato sa kalipay sa Ginoo sa atong gihimo isip lokal nga Simbahan sa Davao.

Sama sa daghang katikaran nga gihimo nila San Pablo ug mga kauban sa sinugdanan sa Kristiyanismo aron pagsangyaw sa Ebanghelyo, kita usab daghan og mga kalihukan aron sa pagpabuhi sa Maayong Balita sa pagka-usa ka Simbahan.

Pari Mangunay

Gipadayag sa mga layko diha sa workshop sa mga groupings nga walay bili ang paghisgot sa programa sa GKK kung ang mga pari, labi na ang kura paroko, dili kumbinsido sa GKK.

“Kinahanglang ang pari mobisita gyud sa GKK. Ang amo ganing pari mosakay man gani sa kabayo kay lisud man ang dalan sa bukid,” pulong sa usa ka delegado gikan sa Mary, Help of Christians Parish.

Gilauman sa mga delegadong layko nga unta ang mga kaparian mosuporta sa layko sa bisan unsang apostolado nga may kalabigitan sa pormasyon, liturhiya, pastoral ug uban pa.

Ang suporta ug presensiya sa mga kaparian, labi na gayod diha sa GKK makadasig gayod sa mga lideres ug miyembro niini.

Mga layko

Sa kalipay nga gibati ni Abp. Valles, milibot siya sa tanang grupo sa unang workshop nga gihimo. Iyang gipadayag nga “ato kining simbahan. I see it now. Ang Simbahan lig-on kaayo.”

Dugang niya nga ang presensya sa mga layko sa tulo ka adlaw nga panagtapok nagpakita sa ilang paghigugma sa Simbahan.

Alang kaniya ngau man god nga maghagu-hago ta’g hisgot niini labi pa nga walay sweldo nga ikahatag ang simbahan alang niining mga layko. Kining ilang presensiya tungod sa ilang gugma.

Nabati sa ni Abp. Valles nga wala siya nag-inusara. Bisag walay makuha, ang mga layko andam nga moalagad sa Simbahan.

“I feel not lonely now kay daghan ang nang-ako. Ayaw mo paabot og grasya kay ang Ginoo na ang bahala ninyo,” dugang niya. (@johnfrancesf/Photos by Brenda Milan)