PULONG SA KINABUHI Hunyo 2014

“Ug hinumdomi, Ako mag-uban kaninyo sa kanunay hangtod sa kataposan sa kalibotan.” (Mt. 28:20)

Sa sinugdanan sa iyang Ebanghelyo nagpahinumdom si Mateo ang ebangelista nga si Jesus, kansang sugilanon iyang isaysay, mao ang “Ginoo-uban-kanato,” ang Emmanuel (Mt 1:23); ug sa kataposan sa Ebanghelyo, gibalik niya ang saad nga magpabilin Siya kanunay uban kanato, bisan ug mibalik na Siya sa Langit; magpabilin Siyang “Ginoo-uban-kanato” hangtod sa kataposan sa kalibotan.

Misulti niini si Jesus sa iyang mga tinun-an human Niya itugyan ang tahas sa pagdala sa iyang mensahe sa tibuok kalibotan. Nakahibalo si Jesus nga gipadala Niya sila sama sa mga karnero taliwala sa panon sa mga lobo; nga makatagbo sila ug daghang kalisdanan, mga pagsukna ug pagpanglutos (Mt.10:16-22). Dili Niya buot nga sila pasagdang mag-inusara sa ilang misyon; mao nga sa higayon sa iyang pagbiya, misaad nga Siya magpabilin. Dili na nila Siya makit-an sa ilang mga mata; dili na sila makadungog sa Iyang tingog; dili na sila makahikap Kaniya, apan anaa Siya sa ilang taliwala sama kaniadto ug gani mas labaw pa kaysa kaniadto! Hangtod niadtong higayona, ang Iyang presensya masinati asa si Jesus matagboan; pananglit, sa Capernaum, sa suba, sa kabukiran o sa Jerusalem. Apan, sugod karon, anaa na Siya bisan asa ang iyang mga tinun-an.

Naghunahuna usab si Jesus kanatong tanan nga naninguha sa pagpuyo taliwala sa adlaw-adlawng mga kakulian sa kinabuhi. Tungod kay Siya mao man ang Gugma nga nagpakatawo, tingali nakahunahuna Siya: buot ko kanunayng mag-uban sa mga tawo; buot kong makaambit sa ilang mga kahingawa, nga makatambag kanila; gusto kong molakaw uban kanila sa mga kadalanan, modayon sa ilang kabalayan, aron mahibalik ang ilang kalipay pinaagi sa akong presensya. Mao ni ang hinungdan nga buot Siyang magpabilin uban kanato aron mabatyagan nato nga Siya anaa sa atong kiliran, mabati nato ang iyang kusog ug ang iyang Gugma. Ang Ebanghelyo ni San Lukas, nag-ingon nga human Nila sud-onga ang pagsaka ni Jesus sa Langit, ang mga tinun-an “inubanan sa dakong kalipay mibalik sa Jerusalem” (Lc. 24:52). Ngano man? Tungod kay ilang nasinati ang nagpaluyong kamatuoran sa Iyang mga gipanulti. Mapuno usab kita sa kalipay kon sa walay pagduhaduha motuo ta sa gisaad ni Jesus:

“Ug hinumdomi, Ako mag-uban kaninyo sa kanunay hangtod sa kataposan sa kalibotan.”

Kining mga pulonga mao ang kataposang mga pulong nga gisulti ni Jesus sa mga tinun-an; mao kini ang timaan sa kataposan sa Iyang yutan-ong kinabuhi. Mao usab kini ang sinugdanan sa kinabuhi sa Simbahan diin anaa Siya matagamtam sa daghang pamaagi: sa Eukarestiya, sa Iyang mga Pulong, sa Iyang mga alagad (mga Obispo, mga pari), diha sa mga kabus, sa mga pinakaubos, mga sinalikway… sa tanan natong mga silingan.

Gusto natong ipatigbabaw ang usa ka Presensya nga espesyal kang Jesus. Siya mismo ang nagpaila kanato diha sa Ebanghelyo ni San Mateo: “Kay diin adunay duha o tulo nga magkatigom sa Akong Ngalan, anaa ako sa ilang taliwala.” (Mt. 18:20). Pinaagi niining Iyang Presensya buot Siya nga magpabilin sa tanang dapit. Kon puy-an nato ang Iyang gimando, ilabina kining Iyang bag-ong kasugoan, masinati nato ang Iyang presensya bisan gawas sa Simbahan, taliwala sa kadaghanan, sa mga dapit diin sila magpuyo,  bisan asa. Ang bahin nga gipangayo gikan kanato, mao ang paghigugmaay nga Makita diha sa pag-alagad, sa pagsinabtanay, sa pag-inambitay sa mga kasakit o kahingawa ug kalipay sa atong kaigsoonan; ang gugma nga maantigong modawat sa tanang pag-antos, ug ang pagkamapasayloon sa tanan nga maoy kinaiya sa mga Kristyanos.

Sa ing-aning paagiha unta ang atong pagpuyo aron ang tanang tawo mahataga’g higayon nga makahimamat Kaniya sukad pa dinhi sa yuta.