Pagtuo lang Makaluwas Na?

Pagtu-o lang ba ang gikinahanglan aron maluwas kita sama sa ginatudlo karon sa mga Born Again Christians ug uban pang mga Sekta? (Pangutana gikan ni Mrs. Jocelyn Tradio sa Maa, Davao City)

Dili tinuod nga pagtu-o lang luwas na kita. Angay natong hisayran nga si Jesukristo nag-ingon nga “Ang nagatu-o kanako kinahanglan nga magabuhat usab” (Juan 14:12), kay kita hukman dili sa pagtu-o lamang kondili sa binuhatan usab (Pinadayag 20:12 ug 2 Cor. 5:10)

Kung pagto-o lang maoy atong sundon siguro bisan pa ang yawa maluwas, kay diha sa Santiago 2:19 ang yawa nagato-o usab. Gani gakurog pa tungod sa ilang pagto-o, mao nga si Kristo miingon kung gusto ka maluwas sunda o tumana ang akong mga sugo (Juan 14:15), kay ang pagto-o nagabuhat pinaagi sa gugma (1 Cor. 13:2). Busa dili igo ang ginawali sa ubang sekta nga tumuo ka lang luwas kana.

Si Apostol Santiago nag-ingon nga “PATAY ANG PAGTUO KUNG WALAY MGA MAAYONG BUHAT” (Santiago 2:14,26). Kay ang pinakasakto nga angay tang buhaton aron kita maluwas magpasakop kita sa Simbahan ni Kristo (Mat. 16:18-19, Efeso 5:23), motoman sa mga kasugoan sa Dios ug sa Simbahan (Juan 14:15,Luc. 10:16), pagto-o nga tinuoray gayud uban sa mga pagdebosyon ug mga pag-ampo, ug pagkinabuhi sa grasya pinaagi sa pagdawat sa lawas ug dugo ni Kristo diha sa Santos nga Misa (Juan 6:54-56),ug pagmalahutayon sa kanunay hangtud sa katapusan (2 Tim. 4:18, Mat. 24:13, Juan 15:5).