Pagmalinawon

Domingo sa Pentekostes
Buhat 2:1-11/ 1 Cor. 12:3-7, 12-13/ Jn. 20:19-23

Kung puno sa kaguliyang ang palibot, wala kitay kalinaw. Mapuno kita sa kahadlok. Ang pagkawalay kahapsay mao ang hinungdan sa pagkulang sa kalinaw. Kung hapsay ang dagan sa kinabuhi, maghari gayod ang kalinaw.

Walay kalinaw ang nga tinun-an sa bag-o pang nabanhaw si Hesus. Napuno sila sa kaguliyang ug kagubot nga dala sa mga pangutana naunsa mang hitaboa nga ang gituohan nilang manluluwas namatay man. Dili pa kaayo klaro kanila ang si Hesus nabanhaw gayod.

Gilibotan usab sila sa kagubot nga dala sa mga tawong buot mopatay kanila tungod sa ilang pagsangyaw sa ilang pagtuo nga si Hesus nabanhaw. Sila gihulga nga patyon kung sila magpadayon sa pagmantala nga ang Kristo nga gilansang ug namatay, Dios diay nga nabanhaw.

Apan sila naghiusa sa usa ka lugar sama sa gisaysay sa unang pagbasa. Wala sila nahimulag ug nag-iya-iya, kondili nagtapok kanunay aron pag-ampo ug pag-inambitay sa tagsa-tagsa bisan sila gikan sa lain-laing lugar. Sila naghiusa ug nagsinabtanay bisan pa man sa nagkadaiyang sinultihan.

Kining maong kahiusa ilang napamatud-an sa pag-gamit lain-lain nilang mga gasa, sa nagkadaiya nilang paagi sa pag-alagad, sa dili managsamang lihok ug buhat. Apan kining tanan alang man sa usa ka Espiritu ug sa usa ka Dios. Mao ra nga Ginoo ang ilang gialagaran.

Tingali, sa mga mosulod sa klase karong Hunyo, dunay mga motungha nga nagkagubot ang huna-huna tungod sa kahadlok kung siya makalahutay ba sa pagtuon. Dunay nahadlok kung makaya ba niya ang pagpa-eskwela sa iyang mga anak. Dunay nagkulang sa kalinaw tungod sa walay kasigurohan kung makalampos ba sa pagtuon.

Apan sama sa unang mga Kristiyanos, ayaw lamang pagbiya sa katilingban; ayaw paghuna-huna nga ikaw nag-inusara kay dunay mga paryente ug higala nga mosapanay kanimo kung mapaubasanon ka lamang modangop kanila; dunay Dios nga andam masapupo kanimo. Palamboa ang imong nadawat nga mga gasa ug tugoti ang uban sa pagpaambit sa ilang makaya, ug ikaw magmalinawon. Sama sa giingon ni Kristo: mainyo unta ang kalinaw.