“Nagatoo ako sa Kapasayloan sa mga sala ugsa Pagkabanhaw sa Lawas”

P: Unsaon man pagpasaylo ang mga sala?

T: Ang Bunyag mao ang una ug labing mahinungdanong sakramento alang sa kapasayloan sa mga sala. Alang niadtong mga sala nga nabuhat human sa Pagbunyag, gitukod ni Cristo ang sakramento sa Pakighiuli ug Pagkumpisal; pinaagi niini ang binunyagan mahiuli uban sa Dios ug uban sa Simbahan.

P: Nganong may gahom man ang Simbahan pagpasaylo sa mga sala?

T: Ang Simbahan adunay misyon ug gahom pagpasaylo sa mga sala tungod kay gitugyan kani kaniya ni Cristo: “Dawata ninyo ang Espiritu Santo. Kon pasayloon ninyo ang mga sala sa mga tawo, gipasaylo kini. Kon dili ninyo pasayloon ang ilang mga sala, dili usab kini pasayloon” (Juan 20:22-23).

P: Unsa man ang kahulogan sa pulong “lawas” (o “unod”) ug unsa kini kamahinungdanon?

T: Ang pagkabanhaw sa unod mao ang literal nga gihisgotan diha sa Credo sa mga Apostoles alang sa pagkabanhaw sa lawas. Ang pulong “unod” nagapunting ngadto sa kahimtang sa tawo diha sa iyang pagkahuyang ug pagka-may-kamatayon. “Ang unod mao ang bisagra sa kaluwasan” (Tertullian). Nagatoo kita sa Dios ang Magbubuhat sa unod; nagatoo kita sa Pulong nga nahimong unod aron pagtubos sa unod; ug nagatoo kita sa pagkabanhaw sa unod nga mao ang katumanan sa kamugnaan ug ang katubsanan sa unod. (Cf. Kompensiyo sa Katesismo sa Simbahang Katoliko, 200-202)