Kinsa man si Kristo alang kanimo?

Solemnidad ni San Pedro ug San Pablo
Buhat 12:1-11/ Ps. 34:2-9/ 2 Tim. 4:6-8, 17-18/ Mt. 16:13-19

Usahay pangutan-on kita ‘nganong kamong mga Katoliko manguros man,’ ang atong tubag ‘bitaw nuh.’ Usahay mapangutan-an kita ‘nganung mangumpisal man mo’, o kaha ‘nganung balik-balikon man ninyo kung kamo mag-rosaryo ang Maghimaya ka Maria,’ ug kita motubag gihapon ‘bitaw nuh.’ Kung kita pangutan-on ‘kinsa diay si Heruskristo alang kanimo’ unsay atong tubag?

Pakyas ang misyon sa mga tinun-an ni Hesukristo kung walay pag-ila Kaniya. Mao nga Siya nagpaila gayod kanila nga Siya mao ang Mesiyas. Siya ilang nasinati nga lahi sa kadaghanan kay Siya Dios man. Ang ilang pag-ila Kaniya bunga sa ilang kasinatian sa pagtuo.

Sa pagkakaron, mapadayunong nagpaila si Kristo kanato pinaagi sa Iyang Simbahan nga gipangulohan sa Santo Papa uban sa mga Obispo ug inabagan sa mga kaparian. Ang paghubad sa Kasulatan, ang pagpasabot sa Tradisyon ug ang Pagtudlo sa mga pagtulon-an pinaagi kanila isip atong mga pangulo, kahigayonan aron kita makapalalum sa atong pag-ila Kaniya. Pinaagi sa ilang giya kita malamdagan ug pamasabot kinsa gayod Siya nga angay natong sundon.

Sama kang San Pedro, kita unta mobangon gikan sa atong pagkapukan sa sala, kaluya, katapol, kahadlok, kabalaka ug sa tanang babag sa gipabuhat sa Dios kanato. Isul-ob nato ang kinaiya ni Kristo aron mosaksi sa tinuod nga pagbag-o, pakig-uli ug pag-alagad sa atong pamilya ug katilingban.

Sama kang San Pablo, makiglumba unta kita inampingan ang atong pagtuo sa Dios nga moluwas kanato sa baba sa mga liyon sa mga nagkadaiyang pagsulay. Mabati unta nato ang pag-unong sa Dios kanato sa kalisud ug hatagan kita Niya sa himaya sa langit.

Ang pagsalmot sa mga sakramento sama sa Misa, kumpisal ug uban pa, ang pagpangilabot sa mga buhat sa pag-alagad ngadto sa uban, ug ang pag-apil sa mga pormasyon ug seminar sa atong katilingban makatabang kanato sa pag-ila kinsa si Kristo sa atong kinabuhi.