Katilingbang Yukaristikanhon, Usa Ka Lawas Nga Diosnon

Pangilin sa Balaang Lawas ug Dugo ni Kristo
Dt. 8:2-3, 14-16/ Ps. 147:12-15,19-20/ 1 Cor. 10:16-17/ Jn. 6:51-58

Kung duna man ugaling usa ka lig-on nga hinungdan ug rason, ngano nga sukad kaniadto hangtod karon, ang katilingban sa mga magtutuo nahimong usa ka lawas nga Diosnon, kana walay lain tungod sa ilang pagka-Yukaristikanhon.

Usa sa mga hinungdan nganu nga ang mga unang magtutuo dili madawat ug gihinaway sa kadaghanan mao ang ilang pagtuo sa tinuod nga presensiya ni Kristo diha sa Santos nga Misa. Apan taliwala sa mga hulga sa kamatayon gikan sa mga tawong wala mutoo sa pagkabanhaw ni Kristo, ang pag-ambit sa unang mga tinun-an sa pulong ug sa talad kan-anan diha sa pagpikas-pikas nila sa pan nga nahimong lawas ni Kristo, sila nahimong lig-on nga katilingban.

Ang ilang pag-ambit sa usa ka lawas ug dugo ni Kristo, maoy nakapadasig kanila sa pagdawatay sa matag usa nga maoy nakapalahutay kanila. Taliwala sa ilang panaglahi, sila nahiusa sa ilang pag-alagad ug pagtinabangay labi na sa nanginahanglan.

Sama sa nahitabo sa panahon ni Moises, naghinatagay sila sa pagkaon ug ilimnon nga gihatag kanila sa Dios. Ang ilang paghinumdom sa pagpakaon ug pagpainom sa Dios kaniadto, ilang gipakita diha sa pag-atiman sa mga kabus, biyuda, bata, huyang, sinalikway ug uban pa.

Maobserbahan nato karon nga ang pagsaulog sa Santos nga Yukaristiya padayon nga makapadugok kanatong mga magtutuo. Kita misalig nga anaa gayod si Kristo diha sa gikonsagrahan nga pan ug bino nga mahimong Iyang lawas ug dugo. Daghan kanato uhaw sa pagsaulog sa Misa diin atong gituohan nga maoy atong kalig-on sa kaugalingon ug katilingban.

Manghinaut kita nga matag higayon nga kita mokalawat Kaniya, uhawon ug gutomon kita sa paghatag og kalig-on sa matag usa. Bation unta nato ang kainit sa paglihok alang sa kahiusa, sa pagsinabtanay ug buhat sa kalinaw alang sa kalamboan. Makakaplag unta ang matag usa sa katagbawan diha sa misyon sa paghuna-huna alang sa kaayohan sa tanan. Niining paagiha kita mahimong katilingbang Yukaristikanhon, usa ka lawas nga Diosnon.