“Isangon Ang Akong Yugo”

Ika-kawhaa’g Upat nga Domingo sa Ordinaryong Panahon
Zec. 9:9-10/ Ps. 145:1-2, 8-11, 13-14/ Rom. 8:9, 11-13/ Mt. 11:25-30

“Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. Isangon ang akong yugo ug sunda ninyo ako, kay malumo ako ug mapa-ubsanon sa espiritu, ug makapahulay kamo. Sayon ang yugo nga akong ihatag kaninyo ug gaan ang ipapas-an ko kaninyo.”(Mt. 11:28-30)

1. Ang tawo nga makabasa o makadungog ani nga mga pulong sa Ginoo makakita siguro o makahidumdum sa nindot kaayo nga imahen sa pagka-maloloy-on ug pagka-mapinanggaon sa Ginoo. Mga pipila ka mga nindot kaayo nga mga imahen nga gipadayag sa atong ebanghelyo karon.

2. Unang-una, si Hesus isip usa ka anak sa panday, nakasulay siguro paghimo ug mga yugo alang sa mga hayop nga gamiton sa uma. Uban sa iyang panday nga amahan daghan siguro sila ug nabuhat nga mga yugo alang sa mga kabaw, kabayo, baka o uban pang mga hayop nga katabang sa usa ka mag-uuma. Ug labaw sa tanan, nasayud si Hesus ug unsa ka kapoy ang kinabuhi sa mag-uuma ug tungod niini, karong adlawa, gigamit niya kini nga kasinatian aron dali kaayo masabtan sa mga tawo ang imahen sa pagka-maloloy-on ug pagka-mapinangnga-on sa Ginoo.

3. Gigamit ni Hesus ang imahen sa “yugo” aron nga e-presentar ang mga nagkalain-laing dagway sa kasinatian sa tawo nga nakahatag ug kabug-at niini kaniya. Nga sa atong kinabuhi, sa panahon nga kapuyon kita sa mga “yugo” sa kinabuhi, mga gipangpas-an nato nga mga realidad nga mga kalisud, mga kasakit, mga pagsulay o mga tentasyon, naa diay maloloy-on ug mapinanggaon nga Ginoo nga nagpaabot nato aron kita makapahulay.

4. Ug tungod niini, mangutana ta sa atong kaugalingon karon: Unsang klase nga kinabuhi nga anaa ta karon? Unsang klaseng yugo o unsa ka dako nga yugo imong gipas-an karon? Malipayon ka pa ba? Kaya pa ba nimo mosabot sa uban? Sa ilang kahuyang? Kaya paba nimo manghatag? Aduna pabay Ginoo sa imong kinabuhi karon? Mga pipila ra siguro kini nga mga pangutana nga possible kapamalandongan nato karong adlawa.

5. Ikaduha, miingon ni Hesus; “…kamong tanan nga gikapuyan…gibug-atan…papahulayon ko kamo…”Buot ipasabot, diha lamang sa Ginoo kita makakita ug mga tubag sa mga pipila ka mga pangutana sa atong kinabuhi. Tungod kay maloloy-on ug mapinanggaon ang Ginoo. Siya lamang ang unang makasabot sa kabug-aton sa “yugo” nga atong gipangpas-an. Siya lamang ang makasabot kanato kung nagmalipayon paba kita sa atong kinabuhi. Siya lamang makasabot sa atong mga kahuyang. Siya lamang ang adunay kakayahan sa paghatag sa atong mga panginahanglan bisan sa atong pagbalikbalik ug buhat ug dautan. Ug labaw sa tanan, ang Ginoo lamang maoy unang nakahibalo kung anaa pa ba Siya sa atong kinabuhi.

6. “…kamong tanan nga gikapuyan…gibug-atan…papahulayon ko kamo…” Niining Dominggoha, possible siguro nga kita moingon, makaduol pa ba kaha kanako ang mga tawo gipangkapuyan sa ilang kinabuhi? Kaduolan pa ba kaha ako sa mga tawo nga naglisud? Kadangpan pa ba kaha ako sa mga tawo nawad-an sa paglaum?

7. Kay kung kaduolan pa kita sa mga tawo nga gipangkapuyan, sa mga tawo nga naglisud o sa mga tawo nga nawad-an ug paglaum, buot ipasabot nga sa pinaka konkreto nga paagi, kita miambit sa pagka-maloloy-on ug pagka-mapinanggaon sa Ginoo.

8. “Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. Isangon ang akong yugo ug sunda ninyo ako, kay malumo ako ug mapa-ubsanon sa espiritu, ug makapahulay kamo. Sayon ang yugo nga akong ihatag kaninyo ug gaan ang ipapas-an ko kaninyo.”