Ang Santisima Trinidad

Karong Domingoha ang tibuok Simbahan sa Kalibutan nagsaulog sa dakong kapistahan nga mao ang paghandom sa dakong misteryo sa atong pagtoo ang kapistahan sa Santisima Trinidad. Usa kini ka balaan nga kasaulogan diin ang Dios mismo maoy atong gihandom ang tinubdan sa tanan.

May pipila ka mga pundok karon nga wala modawat sa pagka-Dios ni Kristo ug gani mapugos pod sila sa dili pagdawat sa Diosnong kinaiya sa Espiritu Santo. Para kanila ang Santisima Trinidad layo ra sa tawhanong panabot. Busa wala kini nila dawata. Ilang nakalimtan ang kamatuoran nga ang Dios nga naglalang sa tawo dili mamahimong ulipon sa tawhanong kaalam. Ilang gisulay paglibog ang termino nga Trinidad nga “tri-thiesm”  o tulo ka dios. Gani ila pang gipasangil nga ang mga Katoliko nag-ila nga tulo ang Dios.

Mao kini ang opisyal nga tudlo sa Simbahan “ Now this is the catholic Faith, We worship in ONE GOD in TRINITY… for the Person of the Father is One, the Son’s another, the Holy Spirit’s another but the GODHEAD of the Father, Son and Holy Spirit is ONE, their GLORY EQUAL, their MAJESTY CO-ETERNAL” (Catechism of the Catholic Church CCC p. 80 par. 266).

Klaro nga ang Simbahan wala nagtudlo nga tulo ang Dios, kondili nagtoo kita ug USA LAMANG KA DIOS diha sa tulo ka Persona ang AMAHAN, ANAK UG ESPIRITU SANTO (Mat. 28:19-20). Tulo ka Persona apan usa lang ang ilang substance o kinaiya sa pagka-Dios.

Ato usab sayron unsa ang kahulugan sa pulong nga PERSONA ug pulong nga KINAIYA. Ang PERSONA usa sa pagkamao nga adunay kaugalingong salabutan, ug gawasnong kabubut-on. Ang KINAIYA mao ang kaugalingong lintunganay’ng hiyas nga nakapamao sa butang nga ginganlan. Ang Amahan ato gayud masabot nga duna siyay salabutan ug kabubut-on nga lahi sa Anak ug Espiritu Santo (Juan 3:16, 20:17), maingon man usab ang sa Anak nga si Jesukristo duna usab siyay salabutan ug kabubut-on nga lahi sa Amahan ug Espiritu Santo (Mat. 28:19-20, Juan 14:6, 28), ug ingon usab ang Espiritu Santo nga aduna usab siyay salabutan ug kabubut-on nga lahi sa Amahan ug Anak (Buhat 13:2, Efeso 4:30, Juan 14:26, 15:26).

Gani ang Dios mismo maoy nagpadayag sa ilang pagk-hiusa diha sa pagka- Dios nga managlahi usab ang ilang Persona (Mat. 3:16-17 ug Genesis 1:26). Kay ang matag tulo ka Persona nagkahiusa diha sa maong Kinaiya sa pagka-Dios, sama pananglitan sa usa ka papel nga gipilo katulo, matag pilo matawag ug papel apan dili sila tulo ka papel kondili usa ka papel sa tulo ka pilo. Busa ang Santisima Trinidad o USA KA DIOS diha sa TULO KA PERSONA usa ka pagtulun-an nga diin ang Dios mismo maoy nagpadayag dinhi kanato ug angay nga atong tohuan ug puy-an sa kanunay.