Ang Kabililhon sa Santos nga Yukaristiya

Ang yukaristiya mao ang pinaka-sentro sa atong paglawig sa espiritohanong kinabuhi. Kini mao ang usa sa pianakataas nga sakramento nga nagahatag ug paglambo sa atong kinabuhi isip usa ka Kristohanon.

Ang pagtukod sa Yukaristiya nahitabo sa Katapusang Panihapon sa Ginoo uban sa iyang mga tinun-an nga gihandum nato matag HUWEBES SANTO sa Semana Santa (cf. Mateo 26:26-28). Apan sanglit kini panahon sa kasub-anan, ang huna-huna sa mga tawo na sentro sa mga kasakit ug kamatayon sa Ginoo o The Lord’s Passion. Usahay malimtan ang paghandom sa pagtukod sa Santos nga Yukaristiya. Mao nga ang Simbahan naghatag ug lahi nga adlaw aron mahatagan gayud ug espesyal nga pagtagad ang maong paghandom sa kapistahan sa Lawas ni Kristo o ang Santos nga Yukaristiya. Kini ang dakong rason ngano nga gihatagan ug lain ug bag-o  nga adlaw sa kapistahan ug kini natuki diha sa usa ka Papal Bull nga gitawag ug “Transiturus”, o usa ka sulat sa Santo Papa nga naghatag ug mando ug pamalaod alang sa katawhan sa Simbahan (cf.www.newadvent.org › Catholic Encyclopedia).

Ang Santos nga Yukaristiya usa ka Sakramento ug usab sakripisyo nga gitukod ni Hesukristo. Diha sa Yukaristiya ubos sa dagway sa PAN ug BINO, ang atong Ginoong Hesukristo anaa gayud, gihalad ug pagadawaton. Busa ang kinatibuk-ang Kristo anaa gayud, matuod ug presenti diha sa Yukaristiya.

Ang pulong nga Yukaristiya nagkahulogan usab ug Pagpasalamat o thanksgiving. Ang Simbahan kanunay nagatudlo nga ang YUKARISTIYA  mao gayud ang tinuod nga lawas ug dugo ni Hesukristo. Kini nga pagtulun-an lisod dawaton sa uban. Kini nga pagtoo sa tinuod nga presensya sa lawas ug dugo ni Kristo nagsubay gayud sa mga pulong nga gitudlo kanato mismo ni Hesukristo.

“AKO ANG PAN NGA NAGHATAG SA KINABUHI, ang inyong mga katigulangan nagkaon sa mana didto sa kamingawan, apan nangamatay gihapon sila, ANG MOKAON SA PAN NGA GIKAN SA LANGIT DILI MAMATAY. AKO ANG PAN NGA GIKAN SA LANGIT NGA NAGHATAG SA KINABUHI. ANG MOKAON NIINING PAN DILI GAYUD MAMATAY. UG ANG PAN NGA AKONG IHATAG MAO ANG AKONG UNOD ARON MABUHI ANG KALIBUTAN. Ang akong UNOD mao ang tinuod nga KALAN-ON, u gang akong DUGO mao ang matuod nga ILIMNON” (Juan 6:48-57).

Sa dili modawat sa tinuod nga presensya sa lawas ug dugo ni Kristo, para kanila usa lamang kini ka simbolo. Sa Juan 6:60-66, daghan sa iyang mga tinun-an ang nakadungog niini ug miingon, lisod kaayong dawaton kining pagtulun-ana. Tungod niini daghan sa iyang mga tinun-an ang mibiya ug wala na gayud mokuyog kaniya.

Busa bisan pa gani sa panahon mismo ni Kristo diin siya mismo ang namulong daghan gihapon ang wala manoo kaniya gawas sa mga Apostoles. Mao nga karong panahona dili gayud katingad-an nga dunay daghan nga mosupak niini. Apan ang Simbahan nga iya ni Kristo kanunay nagatudlo ug nagatoo niini. Sa katapusang panihapon si Kristo mituman sa iyang panaad, samtang nangaon sila mikuha si Jesus sa PAN, nagpasalamat sa Dios ug gipikaspikas niya kini ug mihatag sa iyang mga tinun-an (Mateo 26:26-28/Lucas 22:19-20).

Si Hesukristo gayud mismo ang namulong nga kining PAN ug BINO mao ang iyang matuod nga LAWAS ug DUGO, diin mao ang atong kalan-on ug ilimnon nga makahatag kanato ug kinabuhing walay katapusan (Juan 6:55-58). Kining pagtulun-ana dili usa ka simbolo kondili matuod gayud nga lawas ug dugo ni Kristo diha sa dagway sa Pan ug bino.

Si San Pablo miingon “busa ang mokaon sa Pan sa Ginoo ug moinom sa iyang kupa sa paagi nga dili takus, nakasala batok sa lawas ug sa dugo sa Ginoo (1 Cor. 11:27). Ang Simbahan ni Kristo kanunay gayud nagapahimangno sa tanang magtotoo nga modawat kita niini hinlo ug takus gayud sa atong kinabuhi. Busa adunay dakong bili sa atong Kristohanong kinabuhi kining Santos nga Yukaristiya sanglit kini mao man ang pinakataas ug sentro sa tanang Sakramento.