Ang Dios Gugma

Ex. 34:4-6,8/Dn. 3:52-56/
2 Cor. 13: 11-13 / Jn. 3:16-18

Ang misteryo sa Santisma Trinidad mao ang misteryo sa kinabuhi sa Dios diin pinaagi ni Kristo kita gitawag sa pag ambit niini pinaagi sa bunyag sa ngalan sa Amahan, ug sa Anak, ug sa Espiritu Santo.  Pinaagi sa bunyag diha sa ngalan sa Tres Personas sa Santisima Trinidad kita nangahimong mga kristiyanos. Sa ato pa ang atong kristohanon nga kinabuhi nagpasabot nga kita mga anak sa Dios Amahan diha kang Kristo ang Dios Anak pinaagi sa Dios Espiritu Santo.

“Ang Dios Gugma”(1 Juan 4:16).  Pinaagi niining pagpadayag atong masayran nga ang kinabuhi sa Dios mao ang kinabuhi diha sa katilingban nga nagkahiusa tungod sa gugma. Ang Dios dili makasarili diha sa iyang kaugalingong kinabuhi. Ang misteryo sa Santisima Trinidad mao ang misteryo sa walay katapusang paginambitay og gugma sa Amahan ngadto sa Anak diha sa Espiritu Santo.  Mao kini ang tinuod nga kahulugan sa gugma nga sa kanunuay nagapaambit sa iyang kaugalingon alang ngadto sa uban. Ang gugma dili hakog. Ang gugma kanunuay nagapangita og kaayohan alang ngadto sa tanang gihigugma. Gani ang tibuok binuhat namugna tungod sa pagpaambit sa kinabuhi sa Dios alang ngadto sa tanan. Ang kinabuhi sa Dios kinabuhi   sa kalipay nga walay katapusan tungod kay kini kinabuhi sa walay katapusang gugma. Og mao usab kini ang naghatag og kahulogan sa atong tagsatagsa nga kinabuhi.

Ang atong Ginoong Hesukristo nagmugna sa iyang Simahahan nga nahiusa diha sa Santisima Trinidad. Ang Simbahan mao ang imahen sa Santisima Trinidad dinhi sa kalibutan. Kon atong pagapuyan kininig maong kamatuoran sa kinabuhi sa Dios diha sa Simbahan atong masinati nga kita Simbahan nga nagkahiusa diha sa gugma. Kay kon diin asa ang Dios anaa ang gugma. Ug kon diin asa ang gugma anaa usab ang Dios. Hinaot nga kon asa ang Simbahan anaa usab unta ang gugma ug tinuod nga kalipay. Kalipay tungod kay kita nagkahiusa man diha sa Dios.  Mao kini ang pamaagi aron usab ang tanang mga kalag makabig nato alang sa kaluwasan nga mao ang kalipay nga walay katapusan didto sa langit diin kita mahiusa sa Amahan, ug sa Anak, ug sa Espiritu Santo.