Sr. San Isidro Labrador, Santa Maria dela Cabeza, tabangi kami!

Niadtong Mayo 15, and Diyosesis sa Digos nagsaulog sa Patron sa ilang Dyosesis – San Isidro Labrador. Sa San Isidro Church ug sa tanang Kapilya sa GKK gisaulog usab siya sa daghan kaayong  katawhan nga mga yanong maguuma ug mamumuo.

Sukad pa niadtong Nobieyembre 1979,  si San Isisdro na ang giila nga Patron sa Diocese of Digos tungod kay ang kadaghanan sa mga tawo nga naglangkob niining dapita mga maguuma ug mamumuo sa mga kaaumahan ug kabukiran. Gawas pa niini, dinhi usab mahinagbo ang daghan kaayong mga kaigsoonang lumad nga Tagakaolo, Manobo, ug B’laan. Busa, dili ikaltingala nga mao gayud siya ang ilang Patron.

Sumala sa gamay nga kasayuran sa iyang kinabuhi, buhi si San Sidiro niadtong  mga tuig 1070-1130. Sa ato pa, mga 60 ka tuig siya nga nabuhi niining kalibutan. Yanong maguuma siyang saop ug minyo. Si Maria dela Cabeza nga iyang asawa, maayo ug diosnon usab nga tawo. Nagkaanank sila og usa. Santos nga managtiayon sila.

Apan, talagsaon kaayo si San Isisdro, tungod sa iyang dakong pagtoo sa Dios  nga iyang gipuy-an. Naandan niya nga  sa kanunay matag adlaw, una motrabaho si San Isidro sa iyang uma, modalikyat una siya sa pagsimba sa usa ka simbahan sa syudad sa Sevilla. Gibantog usab, tungod sa iyang aksuod sa Dios,  usahay nasaksihan nga dunay mga aghel nga motabang kaniya aron dili madilantar ang iyang trabaho.

Niining iyang kabantog nga yanong tawo apan nahimong bualahn, balaan, mabination, bisan gani sa mga kahaayopan,  dili maglisod ang katawhan, nga yano usab sama niya,nga modangop kaniya nga masaligon alg sa ilang mga panginahanglanon. Haom gayud kaayo siya sa mga maguuma ug mamumuo.

Apan, dili igo nga mahimo lamang siyang dalangpanan sa magtotoo ug mga deboto. Labing mahinungdanon alang sa tanan, nga ang iyang kinabuhi mahimong dayag ug kusog nga pahinumdom sa tanan sa tawag sa Dios alang sa tanag tawo,  nga magkinabuhi nga balaan. Maampoon, masimbahon ug maalagaron.

Kon giila si San Francisco de Asis nga Patron sa Kinaiyahan tungod sa iyang pagtagad ug pagmahal sa mga hayop, nan, mahimo usab natong ilhon usab sa San Isidro Labrador nga Patron usab sa kinaiyahn tapad kang San Francisco. Ug kini mahimong mahinungdanon kaayo karon alang kanato,  nga nagkinahanglan ang pagkahiul sa atong pagtagad, pagpanalipod ug pagbuhi’g balik sa kabaskog sa kinaiyahan nga gikabuhian natong tanan.

Mamahimo gayud unta si San Isidro Labrador nga atong Patron, pinaagi sa pagawat sa iyang maayong sumbanan sa pagkadiosnon, maampoon, masimbahon ug maalagaron sa tanan, lakip na ang kinaiyahan. Magdasig unta siya kanato sa paglimbasog pa gayud sa pagpanalipod sa kinaiyahan. Mahimo unta kitang maayong tinugyanan sa kinaiyahan sama kaniya.

Labot pa niini, dili usab makadaot nga dangpan siya ug si Santa Maria dela Cabeza sa mga magtiayon alang sa ilang mga kalisdanan ug kalamboan sa panagtiayon ug pagkaginikanan. Ang mga magtiayon karon ug mga pamilya gihagit u g gihulga sa daghang mga makadaot kanila gikan sa ilang palibot. Nagkinahanglan sila ug mga tigpanalipod ug mga tigpataliwala ngadto sa langitnong mga panalangin.

Viva Sr. San Isidro Labrador! Santa Maria dela Cabeza, tabangi kami!