“Simbahang Samaran Nga Nagsangyaw Sa Kadalanan”

Pagsaka Sa Langit sa Atong Ginoo
Buhat 1:1-11/ Ps. 47:2-3, 6-9/ Ef. 1:17-23/ Mt. 28:16-20

Niining Pagsaka sa Langit sa atong Ginoo, gisaulog matag tuig sa tibuok Simbahan ang Kalibutanong Adlaw sa Komunikasyon. Dinasig sa tema nga “Komunikasyon Nga Nag-alagad Alang Sa Tinuoray Nga Kultura Sa Pakighimamat”, gipahimangnoan kita karon nga mamahimong Simbahang samaran nga nagsangyaw sa kadalanan.

Sa unang pagbasa, ang mga tawo nga gipili sa Ginoo nagpadayag sa ilang pagkasamaran diha pagpangita og kaayohan pinaagi sa pagpangutana kang Hesus: “Ginoo ipahiuli mo ba pag-usab niining panahona ang gingharian sa Israel?” Samaran sa ilang kahimtang sa kalisud ug sa pagka-ulipon, ang mga tinun-an nangandoy sa kaluwasan ug kabag-ohan. Sila gipasaligan ni Hesus nga mamahimo silang Iyang mga saksi atubangan sa tanan kung mokunsad na kanila ang Espiritu Santo.

Sa ikaduhang pagbasa, si San Pablo naghangyo sa Dios nga ang iyang katawhan mapuno sa kaalam ug pagsabot, lamdag ug paglaum aron sila makaamgo sa gahum ni Kristo nga pangulo sa Simbahan. “Ang Simbahan mao ang lawas ni Kristo, ang kahingpitan Niya nga mao ang naghingpit sa tanang butang.”

Matud pa sa Ebanghelyo, kitang mga tinun-an ni Kristo magpadayon sa iyang misyon. Atong misyon ang pagpabalik sa tinuoray nga pagkasilingan, sa pagtukod ug dili sa pagguba, sa pagtabang ug dili sa pagpahimulos. Katungdanan nato ang pagpabati sa tinuod nga pagpakighimamat sa Dios kanila nga nalibog ug naluya, nahisalaag ug nagpuyo na sa kangitngit. Kining mga tawhana usahay mahimamat diha sa internet ug uban pang porma sa social media. Sila naghulat nga mabati ang presensiya sa Ginoo pinaagi sa atong pagdawat, pagsabot ug giya.

Bisan pa man kita naglawig pa sa kadalanan, kita gigamhan sa Espiritu diha sa atong bunyag aron pagsaksi ni Kristo. Bisan pa man kita samaran tungod sa daghang hagit nga gipas-an, kita giawhag nga dili lamang maghuna-huna sa kaugalingon kondili usab sa pagtandog sa uban kay atong misyon nga mamahimong Simbahan nga nagsangyaw sa kadalanan.