“Santo Subito”

Sa adlaw sa lubong ni Pope John Paul II niadtong tuig 2005, nakita sa tibuok kalibutan ang dakong banner didto sa Roma nga nag-ingon SANTO SUBITO, sa ato pa, himoon unta dayon siyang Santo.

Usa sa pinakapaspas nga pagproseso sa pagkasanto, human lamang sa siyam ka tuig gikan sa iyang pagpanaw ngadto balik sa Amahan sa langit, natuman ra gayud ang maong pangandoy sa katawhan, niadtong miaging Dominggo sa Diosnong Kalooy, Abril 27, 2014 didto sa Roma kanus-a gihimo ang pagdeklarar nga santo kang Juan Pabl II ug ni Juan XXIII – duha ka Papa sa Simbahan sa atong kapanahunan nga gihimong modelo, sumbanan, ug tigpangaliya alang sa katawhan ngadto sa kabalaan sa kinabuhi.

Mideklarar si Papa Francisco  “…. pinaagi sa gahum sa atong Ginoong Hesukristo, ug sa balaang mga Apostoles Pedro ug Pablo, ug sa atong kaugalingong gahum, human sa gikinahanglang pagsusi ug makanunayong pangamuyo alang sa Diosnong panabang, ug human sa pakitambag sa daghan natong mga igsoong Obispo, among gideklarar ug gipamatuod nga si Beato Juan XXIII ug si Beato Juan Pablo II, himoong mga Santo, ug among ilakip sila sa lista sa mga Santo, ug among gimando nga pasidunggan sila sa tibuok Simbahan. Sa ngalan sa Amahan, sa Anak, ug sa  Spirito Santo.”

Usa ako sa mga halos 1000 ka mga Obispo ug mga Pari uban sa halos 1 milyon ka mga tawo didto sa Roma nga miadto didto aron mahimong kabahin niining talagsaong hitabo sa grasya alang sa Simbahan. Sama sa inyong nakita saTV nagpunsisok ang mga tawo dili kamang didto sa Batikano kon dili ngadto usab sa mga kadalanan ug mga park diin adunay mga dagkong screen diin makita gihapon ang seremonyas.

Nindot kaayo ang selebrasyon. Sa wala pa magsugod ang Misa, aron pagpahiluna sa katawhan alang sa solemneng selebrasyon, gikanta sa Koro ang Chaplet sa Divine Mercy diin ang katawhan misabat usab. Human sa Misa, ang Easter Angelus. Misunod dayon ang pagtimbaya ni Papa Francisco sa mga representante sa mga nasud. Ug ang gikalipay na usab sa katawhan mao nga milibot si Papa Francisco ngadto sa mga tawo nga anaa sa St. Peter’s Square.

Niadtong balaang kasaulogan, nasaksihan nako, ug namatikdan usab kini sa Media, ang gitawag na karon didto sa Roma nga “milagro ni Franciso.” Matud pa, sukad nga nahimong santo papa si Papa Francisco kausa pa lang gayud giulan ang iyang public appearance.  Niadtong adlaw sa canonization, gipahimangno na nga moulan sa  Roma. Tuod man, mingdag-om ug naghulat na lang gayud nga mobundak ang ulan didto mismo sa may Basilika ni San Pedro. Mingtaligsik lang gamay. Nanghatag nag mga payong alang sa mga Obispo. Apan wala gayud moulan.

Pag-abot gayud sa takna nga gideklarar na ni Papa Francisco ang duha nga Santo, miabli ang langit ug ang adlaw naglamdag sa tibuok dapit sa Batikano. Pastilan! Hasta ang kinaiyahan, nagpadayag sa iyang paguyon ug pagpasidunggog sa duha ka mga Santo. Human sa seremonyas, pagkahapon na, niulan na gayud.

Sama sa giawhag ni Papa Francisco kanato mosunod karon ang padayong natong  pagtuon ug pagsunod sa kinabuhi ug kasantos sa duha ka Santo. Ipadayon usab nato ang pangamuyo kanila aron tabangan kita nila sa atong pagpadayon sa ilang gisugdan, ang gikinahanglan nga pag-abli ug  pagbag-o sa Simbahan ngadto sa moderning kalibutan.