Pabilin Diha Sa Gugma Sa Dios

Ikaunom nga Domingo sa Pagkabanhaw
Buhat 8:5-8, 14-17/ Ps. 66:1-7, 16-20/ 1 Ped. 3:15-18/  Jn. 14: 15-21

Si Jesus mihimo og usa ka makatandog nga pag-pakighinabi, pagpahinumdum ug pagpasida-an ngadto sa iyang mga tinun-an.

Una, magpabilin diha sa maong gugma ug pagtuman sa iyang mga kasugo-an. Ikaduha, ang akong amahan maghatag kaninyo sa Espirito Santo ug dili na kamo mag-inusara. ikatulo, balikon ko kamo sa dili madugay.

Mipadayon si Jesus sa pag-ingon ngadto sa iyang mga tinun-an, “Kinsa kadtong nahigugma kanako, higugma-on usab sa akong Amahan ug ako mahigugma ug magpadayag usab diha kaniya.

Ang gugma ni Jesus ngadto sa iyang mga tinun-an ug dinhi kanato ti-unay, matinud-anon ug dili kaduha-duha-an. Dili maka-ako si Jesus nga mobiya ug motalikod sa iyang mga tinun-an nga walay kasigurohan ug walay kapa-ingnan.

Sama sa mga tinun-an, kita usab makasalig kang Jesus nga dili kita niya biya-an, ni pasagdan, ni talikdan diha sa atong mga panginahanglan. Siya ang atong kasigurohan kung kita magpabilin sa iyang gugma ug matinumanon sa pagbuhat sa iyang mga kasugu-an, Ang pag-ila sa Espirito Santo, ang tigpamaba sa Dios diha sa kinabuhing Kristohanon.

Diha lamang sa Dios ang atong pagsalig. Kay siya lamang ang makahatag og katagbawon sa atong mga panginahanglan.