Kinsa ang Magbalantay? Kinsa ang Panon?

Ikaupat nga Domingo sa Pasko sa Pagkabanhaw
Buhat 2:14, 36-41 /Ps. 23:1-3,3-4, 5-6<
1Ped. 2:20-25 / Jn. 10:1-10

Ang paggamit ni Hesus sa maong paghulagway sa magbalantay ug panon dili layo sa kasinatian sa katawhan sa Israel; bililhon sa ilang panginabuhi ang pag-atiman ug kahayupan ingon man sila nagpasigarbo nga sila “panon” sa Dios.

Sa atong Ebanghelyo, si Hesus nagpaklaro sa tinuod nga kinaiya sa usa ka magbalantay ug iyang ginsakpan.

Matud pa, ang maayong magbalantay moagi sa “pultahan” aron sa pakighimamat sa iyang panon. Siya nagtinguha lamang sa kaayohan ug kagawasan sa iyang ginsakpan dili ang ilang kalaglagan. Ikaduha, siya nakaila ug suod kanila. Ang iyang tingog ug presensiya maoy ilang giya, seguridad ug katagbawan. “Ang Ginoo mao ang akong magbalantay, ug walay nakulang kanako” (23:1).“Siya ang atong Dios; kita ang katawhan niya nga iyang giatiman, ang panon nga iyang giamuma” (95:7).

Si Hesus kining maayong magbalantay. Siya misulod sa kasaysayan sa katawhan isip katumanan sa gisaad nga kaluwasan. Gitugyan kaniya ang tanan sa iyang Amahan pinaagi sa balaang “pultahan,” ang Balaod ug mga propeta. Ingon man, siya nakigsuod sa katawhan, nanudlo, nang-ayo sa mga masakiton ug giyawaan, nagpabuka sa mga mata sa mga buta ug nagbanhaw sa mga minatay. Tungod sa paghigugma, miula sa iyang kaugalingon sa krus alang sa kagawasan sa tanan.

Sa laing bahin, ang “panon” mao sila nga nakaila ug naminaw sa tingog sa Magbalantay. Sila nga midawat, mikat-on ug nagpadayon sa pagkat-on sa iyang gitudlo ug panig-ingnan. Sila nga miabli sa ilang kasingkasing, salabotan ug kaugalingon sa iyang pagmando ug paggiya. Sila nga wala misunod ug nagpalinlang sa mga tigpaka-aron-ingnon nga magbalantay o “mini” nga mga propeta.

Unsa kita kamatinud-anong sakop sa “panon” sa Dios? Kumusta ang atong pagmaminaw sa iyang tingog ug tanyag sa kagawasan? Si Hesus, ang maayong magbalantay, nagpadayon sa paggiya, pag-atiman, pagpanudlo ug paghatag sa iyang kaugalingon pinaagi sa ministriya sa Simbahan.